Qazaqstandyq áýe kompanııasy daýyl kezinde ushaqty sátti qondyrdy
Londondaǵy “Henk” dúleı daýyly kezinde qazaqstandyq áýe kompanııasy ushaǵyn sátti qondyryp, brıtanııalyqtardy tań qaldyrdy. Birneshe kúnnen beri Anglııa men Ýelste kóterilgen qatty jel men nóser jaýyn turǵyndardy jaryqsyz qaldyryp, sý tasqyny kólik qatynasyn úzgeni belgili, dep habarlaıdy Kazinform tilshisi.
Londonnyń Hıtroý áýejaıynan túsirilgen kóriniste otandyq áýe kompanııasynyń ushaǵy aspanda terbelip baryp, jerge qonyp jatyr. Oqıǵa kýágerleri pılottyń sheberligine tańdanysyn jasyrmady.
Bul sońǵy úsh aıda tirkelgen segizinshi tabıǵı apat. Oǵan “Henk” degen ataý berildi. Jeldiń jyldamdyǵy saǵatyna 130 shaqyrymǵa deıin jetip, halyqty ábigerge saldy. Shatyrlardy qulatyp, aǵashtardy túp tamyrymen julyp áketti. Jeńil kólik jáne temirjol qatynasy toqtady. Sý tasqyny týraly 250-deı eskertý jasaldy, myńdaǵan abonent jaryqsyz otyr. Turǵyn úıler sýdyń astynda qalyp, halyqtyń ómirine qaýip tóndi.
“Sýǵa batyp, qaıta shyqqan kólikti alystan baıqap qaldym. Keıin onyń aǵynmen jyljyp, kópirdiń astyna tirelgenin kórdim. Kólik júrgizýshisi áıel kisiniń jan daýysy shyqty. Іshinde 3 jasar qyzy bar eken. Oılanbastan qutqarýǵa kirisip, ekeýin de syrtqa aman-esen shyǵardym”, - deıdi oqıǵa kýágeri, Bırmıngem qalasynyń turǵyny Lıam Stıch.
Tabıǵı apattyń qurbany bolǵan jáne jaraqattanǵandar bar. Aýa raıyn boljaýshylar jaǵdaıdyń áli de qaýipti ekenin eske salady. Ǵalymdar mundaı qubylystardyń jıi tirkelýin jerdiń betindegi ortasha temperatýranyń artýymen baılanystyryp otyr.
“2023 - tarıhtaǵy eń jyly jyldardyń biri boldy. Aýa temperatýrasy rekordtyq kórsetkishke jetti. Daýyldardyń kóbeıýine jahandyq jylyný sebepshi”, - deıdi Ulybrıtanııa Meteorologııalyq qyzmetiniń aǵa ǵylymı qyzmetkeri Maık Kendon.
Mamandardyń pikirinshe, atmosferadaǵy kómirqyshqyl gazynyń deńgeıi artyp jatyr. Olar 2024 jyl tipti ystyq bolady dep boljaıdy. Ónerkásiptik dáýir bastalǵaly dúnıejúzi boıynsha aýa temperatýrasy tselsıı boıynsha shamamen 1,1 gradýsqa kóterilgen. Eger árbir eldiń úkimeti klımattyq ózgeristerge erekshe nazar aýdarmasa, jaǵdaı ýshyǵa bermek.
