Qazaqstandyq áýe kompanııalarynyń Taıaý Shyǵysqa reısteri qashan jandanady
ASTANA. KAZINFORM — Taıaý Shyǵysqa áýe kóliginiń qaýipsiz saparyna jaǵdaı jasalmaǵan. Bul týraly QR Kólik vıtse-mınıstri Talǵat Lastaev málim etti.
— Qazaqstandyq áýe kompanııalary sol baǵyttaǵy reısterdi ýaqytsha toqtatty. Ol óńirdegi ahýal áli de turaqsyz ári qubylmaly. Keıbir kompanııalar áýe tasymalyn jalǵastyryp keledi, ıaǵnı olardyń qatarynda Fflydubai-dy atap ótýge bolady. Degenmen, jaqynda dýbaılyq áýejaıdyń jumysy da ýaqytsha toqtap qalǵan edi. Bul turǵyda qaýipsiz reısterge tóngen qaýipke baılanysty sheshimder ózgerip jatyr, — dedi T. Lastaev.
Onyń aıtýynsha, atalǵan máseleni eskere otyryp, QR Syrtqy ister mınıstrligi men Kólik mınıstrligi aldaǵy ýaqytta tıisti sheshim qabyldaıdy.
— Ázirge, otandyq kompanııalar ýaqytsha ol jaqqa saparlamaıdy. Sondyqtan Taıaý Shyǵystaǵy áýejaılardyń turaqty jumysy týraly aıta almaımyz, — dedi vıtse-mınıstr.
Buǵan deıin habarlanǵandaı, Iranǵa jasalǵan shabýyl Taıaý Shyǵystaǵy áýe qatynasyn toqtatty.
Aıta keteıik, Taıaý Shyǵystan 10 myńnan astam Qazaqstan azamaty shyǵaryldy.
