Qazaqstandyq áýe kompanııalarynyń ıeliginde 99 ushaq bar

ASTANA. KAZINFORM – 2025 jyly otandyq áýe kompanııalardyń parki 25 ushaqpen tolyqtyrylady. Atap aıtsaq, «Air Astana» jáne «SCAT» avıakompanııalary Airbus jáne Boeing zaýyttarynan sý jańa ushaqtardy jetkizýdi josparlap otyr.

QR Kólik mınıstrligi Azamattyq avıatsııa komıtetiniń baspasóz qyzmeti agenttik tilshisine bergen jaýabynda 2025 jyldyń sońyna deıin «Air Astana» Airbus A320/321 markaly 15 ushaqty jáne Boeing 787 markaly 2 ushaqty satyp alatynyn aıtty. Al «SCAT» Boeing 737 markaly 8 ushaqty jetkizýdi kózdep otyr. 

Belgili bolǵandaı, byltyr 12 jańa ushaq qatarǵa qosylǵan. «Air Astana» 8 ushaq satyp alsa, «SCAT» 4 ushaqpen shektelgen. Al «Air Astana» 1, «SCAT» 4 ushaqty esepten shyǵarǵan. 

«Qazir qazaqstandyq avıakompanııalardyń ıeleginde 99 ushaq bar. Atap aıtsaq, «SCAT» - 37, «Air Astana» – 50, «Qazaq Air» – 5, «ıÝjnoe nebo» – 5 jáne «Jetisý» áýe kompanııasyna 2 ushaq tıesili. Kóbine Airbus A320-321 (42) jáne Boeing 737 (33) markaly ushaqtardyń úlesi basym», - dedi Azamattyq avıatsııa komıtetiniń baspasóz qyzmeti.

Tehnıkalyq qyzmet kórsetý baǵdarlamasyna sáıkes, bir ushaq (Airbus A320 jáne Boeing 737) qalypty jaǵdaıda shamamen 120,000 - 150,000 ushý saǵattaryna deıin qyzmet kórsete alatynyn atap ótken jón.