Qazaqstandyq áýe kompanııalary bıyl 9 ushaq satyp almaq

ASTANA. KAZINFORM – Bul týraly búgin QR Kólik mınıstrliginiń alqa otyrysynda aıtyldy, dep habarlaıdy vedomstvonyń baspasóz qyzmeti.

Aıta keteıik, otyrysta Kólik mınıstrliginiń 2025 jyly atqarǵan jumystary qorytyndylanyp, 2026 jylǵa arnalǵan mindetter aıqyndaldy.

Vedomstvo taratqan málimetterge qaraǵanda, 2026 jylǵa arnalǵan josparlar sheńberinde temirjol salasynda «Darbaza – Maqtaaral», «Moıynty – Qyzyljar» jelileriniń qurylysy, «Altynkól – Jetigen» jáne «Beıneý – Mańǵystaý» ýchaskelerin jańǵyrtý jumystaryn aıaqtaý, sondaı-aq «Baqty – Aıagóz» jobasyn jalǵastyrý kózdelgen.

Budan bólek, vokzaldardy jańǵyrtý jumystaryn aıaqtaý jáne jolaýshylar men júk vagondary parkin odan ári jańartý josparlanyp otyr.

Avtojol salasynda jalpy uzyndyǵy 11 myń shaqyrymdy qamtıtyn jol qurylysy men rekonstrýktsııalaý jumystary jalǵasady.

Atap aıtqanda, «Qyzylorda – Jezqazǵan» avtojolynda (Ulytaý oblysy aýmaǵynda) jumystar júrgiziledi. «Ortalyq – Batys» jobasyn iske asyrýdyń belsendi kezeńi bastalady. Sonymen qatar «Qaraǵandy – Jezqazǵan», «Aqtóbe – Qyzylorda» jáne «Beıneý – Sekseýil» jobalaryn bastaý josparlanǵan.

Mýltımodaldy tasymaldy damytý maqsatynda Aqtaý jáne Quryq porttarynyń ınfraqurylymyn jańǵyrtý, onyń ishinde aılaqtardy rekonstrýktsııalaý jáne túbin tereńdetý jumystaryn aıaqtaý kózdelip otyr.

Áýe habtaryn jáne avıatsııalyq ınfraqurylymdy damytý aıasynda Astana men Shymkentte ekinshi ushý-qoný jolaqtaryn salý, Almaty áýejaıynyń ishki reıster termınalyn jáne Aqtaý áýejaıynyń perronyn rekonstrýktsııalaý, Atyraý qalasynda jańa termınal salý, Pavlodar áýeaılaǵyn jańǵyrtý, Arqalyq áýejaıyn qalpyna keltirý, sondaı-aq Katonqaraǵaı, Zaısan jáne Kendirli kýrorttyq aımaqtaryndaǵy áýejaılar qurylysyn aıaqtaý josparlanyp otyr.

2026 jyldyń sońyna deıin otandyq áýe kompanııalary 9 jańa áýe kemesin satyp alyp, áýe parkiniń sanyn shamamen 118 ushaqqa deıin ulǵaıtýdy josparlap otyr. Bul jolaýshylar tasymaly syıymdylyǵyn arttyrýǵa, jańa halyqaralyq baǵyttardy ashýǵa jáne reıster jıiligin kóbeıtýge múmkindik beredi.

-Alqa otyrysynyń qorytyndysy boıynsha Premer-mınıstrdiń orynbasary Roman Sklıar kólik-logıstıka salasyn odan ári damytý boıynsha qosymsha mindetterdi aıqyndap, naqty tapsyrmalar berdi,- delingen habarlamada.

Osyǵan deıin ótken jyly elimizde 13 myń shaqyrymǵa jýyq jol jóndelgeni týraly jazdyq.