Qazaqstandyq áýe kompanııalar 15 mln-ǵa jýyq jolaýshy tasymaldaǵan

ASTANA. KAZINFORM — Sońǵy 5 jylda azamattyq avıatsııa salasynyń kórsetkishteri eki esege ósti. Bul týraly Kólik vıtse-mınıstri Talǵat Lastaev baıandady.

Onyń aıtýynsha, ótken jyly qazaqstandyq áýe kompanııalar 14 mln 700 myń jolaýshyny tasymaldady, ol 2023 jyldyń kórsetkishimen salystyrǵanda 11%-ǵa kóp.

Áýejaıdarda qyzmet kórsetilgen jolaýshylar sany 14%-ǵa ósip, 29 mln 700 myń adamdy qurady.

— Ushý qaýipsizdigi — azamattyq avıatsııanyń basty mindeti. Qazaqstanda bul kórsetkish, Batys Eýropa elderiniń kórsetkishterimen qatar qoıýǵa keledi — Halyqaralyq avıatsııalyq uıymynyń baǵalaýynsha 82%-dy quraıdy. Bul álemdik ortasha deńgeıden (70,8%) 11,2%-ǵa joǵary, — dedi T. Lastaev Úkimettiń búgingi otyrysynda.

2024 jyly Eýrokomıssııa Qazaqstan áýe kompanııalary úshin Eýropa Odaǵyna ushýǵa qatysty «Qara tizimdegi» barlyq shekteýlerdi tolyǵymen alyp tastady.

— Bıyl shilde aıynda Memleket Basshysynyń shaqyrýymen alǵash ret Halyqaralyq azamattyq avıatsııa uıymy (IKAO) Keńesiniń prezıdenti Salvatore Shakkıtano resmı saparmen Qazaqstanǵa keledi. Bul Qazaqstan men IKAO arasyndaǵy yntymaqtastyqtyń jańa satysy bolmaq, — dedi vıtse-mınıstr.

Aıta keteıik, IKAO Qazaqstannyń azamattyq avıatsııa salasyn 2050 jylǵa deıin damytýdyń strategııalyq bas josparyn ázirleıdi.