Qazaqstandyq aýdıtorlar Ońtústik Koreıanyń ozyq tájirıbesin meńgerdi
ASTANA. KAZINFORM — Qazaqstandyq delegatsııanyń Seýl qalasyna jumys sapary 6-17 sáýirde Koreıa tarapynyń shaqyrýymen ótti. Kásibı baǵdarlamany Aýdıt jáne ınspektsııa oqý ınstıtýty (AITI) jáne Koreıanyń halyqaralyq yntymaqtastyq agenttigi (KOIKA) uıymdastyrdy. Bul týraly Joǵary aýdıtorlyq palata málim etti.
Palatanyń saraptamalyq áleýetin arttyrý maqsatynda vedomstvonyń orta jáne joǵary basqarý býyny mamandar toby qysqa merzimdi beıindik oqytýdan ótti.
Eki aptalyq oqý barysynda qatysýshylar Koreıanyń joǵary aýdıt organynyń damý tarıhyn, konstıtýtsııalyq jáne zańnamalyq mártebesin, aýdıtorlyq is-sharalardy ótkizýdiń jergilikti standarttary men rásimderin, ádisnamasyn zerdeledi.
— Koreıanyń qoǵamdyq kólik salasyndaǵy tıimdilik aýdıti jeke qaraldy. Onyń nátıjeleri osyndaı tekserýlerge qatysty tásilderdi qaıta qaraýǵa ákeldi: basty nazar jol berilgen buzýshylyqtardy tirkeýden qurylys bastalǵanǵa deıin tehnıkalyq kezeńderdi qatań baqylaýǵa aýysty, — delingen habarlamada.
Joǵary aýdıtorlyq palatanyń mamandary Koreıanyń qarjylyq aýdıt jáne bıýdjettik baǵdarlamalardyń tıimdiligin baǵalaý júıelerimen tanysty.
Atap aıtqanda, Koreıanyń bıýdjet júıesiniń damý kezeńderi shyǵystardy bap boıynsha baqylaýdan bastap zamanaýı baǵdarlamalyq nysanaly tásilge deıin (Performance-Based Budgeting) egjeı-tegjeıli qaraldy. Munda qarajatty ıgerý faktisi ǵana emes, belgilengen KPI boıynsha naqty nátıjelerge qol jetkizý baǵalanady. Sonymen qatar Koreıada aýdıtorlar ıgerilmegen aqshanyń kelesi qarjy jylyna ne úshin aýysatynyn, rezervtik qorlardyń qalaı paıdalanylatynyn jáne qurylys materıaldary arzandaǵan jaǵdaıda jobalardyń quny qanshalyqty ýaqytyly tómendeıtinin muqııat tekseredi.
Koreıa Respýblıkasynyń aýdıttegi tsıfrlyq quraldaryna da erekshe nazar aýdaryldy. Atap aıtqanda, BARON koreıalyq aqparattyq-taldaý júıesi, qarjylyq quqyq buzýshylyqtar men sybaılas jemqorlyqty anyqtaýǵa arnalǵan tsıfrlyq krımınalıstıka (Digital Forensics) ádisteri, sondaı-aq qarjy sektorynda kıberqaýipsizdikti qamtamasyz etý jónindegi sharalar zerdelendi.
Máselen, BARON júıesiniń jumysy úshin myqty IT-komandasy bar jeke Derekterdi taldaý ortalyǵy qurylǵan. Ol aýdıtorlarmen tyǵyz qarym-qatynasta jumys isteıdi: olardyń suraýy boıynsha tekserýge arnalǵan qajetti analıtıkany jınaıdy, óńdeıdi jáne jiberedi. Málimetter Koreıanyń 35 memlekettik organynyń 53 júıesimen ıntegratsııa negizinde qalyptastyrylady.
— Oqý baǵdarlamasy ekijaqty sıpatta ótti. Otandyq mamandar QR Prezıdentiniń bastamasy boıynsha qazaqstandyq memlekettik aýdıt júıesinde júrgizilip jatqan reformalar, sondaı-aq qoldanystaǵy jumys praktıkalary, engizilip jatqan halyqaralyq standarttar, tsıfrlyq quraldar jáne 2026-2030 jyldarǵa arnalǵan damý jospary týraly egjeı-tegjeıli baıandady. Arnaıy baıandama aıasynda Joǵary aýdıtorlyq palatanyń konstıtýtsııalyq mártebesi, qurylymy, fýnktsııalary, ókilettikteri jáne vedomstvonyń negizgi damý kezeńderi týraly málimet tanystyryldy, — dep jazdy palatanyń baspasóz qyzmeti.
Oqý qorytyndysy boıynsha Joǵary aýdıtorlyq palatanyń mamandary Koreıanyń úzdik praktıkasyn qazaqstandyq memlekettik aýdıt jaǵdaılaryna beıimdeýge baǵyttalǵan taqyryptyq is-qımyl josparyn (Action Plan) ázirledi.
Koreıa Respýblıkasynyń Aýdıt jáne ınspektsııa jónindegi keńesimen yntymaqtastyq QR Joǵary aýdıtorlyq palatasynyń halyqaralyq qyzmetiniń basym baǵyttarynyń biri bolyp qala beredi. Sapardyń nátıjeleri jumys barysynda qoldanylyp, Qazaqstanda memlekettik aýdıttiń odan ári damýyna yqpal etetin bolady.
Aıta keteıik, buǵan deıin Joǵary aýdıtorlyq palatanyń ókilderi Ázerbaıjanda aýdıt júrgizgen bolatyn.
