Qazaqstandyq astyq eksporty 13 mln tonnadan asty
ASTANA. KAZINFORM — 2025 jylǵy qyrkúıekten 2026 jylǵy maýsymǵa deıingi kezeńde astyq pen astyq balamasyndaǵy un eksporty 13,1 mln tonna boldy. Bul aldyńǵy maýsymnyń osy kezeńimen salystyrǵanda 13% artyq. Atalǵan kezeńde eksport kólemi 11,6 mln tonnaǵa jetti. Bul týraly Qazaqstan temir joly ulttyq kompanııasy habarlady.
Vedomstvonyń málimetinshe, eksport kóleminiń ósýine negizinen Ortalyq Azııa elderi men Aýǵanstanǵa jetkizilimderdiń artýy yqpal etti.
Atap aıtqanda, Ózbekstanǵa eksport 38% ósip, 3,9 mln tonnadan 5,5 mln tonnaǵa jetti. Qyrǵyzstanǵa jetkizilim kólemi 1,4 esege artyp, 357 myń tonnadan 504 myń tonnaǵa deıin ulǵaıdy.
Aýǵanstanǵa eksport 59% ósip, 1,4 mln tonnadan 2,2 mln tonnaǵa jetti. Al Túrikmenstanǵa jetkizilim kólemi 37% artyp, 150 myń tonnadan 205 myń tonnaǵa deıin ósti.
— Júk tasymaly kórsetkishteriniń oń serpini qazaqstandyq aýyl sharýashylyǵy ónimderine suranystyń joǵary ekenin jáne ońtústik baǵyttaǵy logıstıkalyq dálizderdiń turaqty jumys istep turǵanyn kórsetedi. Sonymen qatar bul eksporttyq logıstıkany damytý jáne sheteldik seriktestermen saýda-ekonomıkalyq yntymaqtastyqty keńeıtý baǵytynda qabyldanyp jatqan sharalardyń tıimdiligin aıǵaqtaıdy, — delingen kompanııanyń baspasóz qyzmeti taratqan habarlamada.
Eske salaıyq, buǵan deıin Qazaqstan 21 elge balyq ónimderin eksporttaıtynyn jazǵanbyz.
