Qazaqstandyq aspazdar Bakýde baıqaýǵa qatysyp jatyr
ASTANA.KAZINFORM - Bakýde ótip jatqan 31-shi InterFood Azerbaijan halyqaralyq tamaq ónerkásip kórmesi aıasynda «Altyn Shah» VI ulttyq aspazdyq chempıonaty bastaldy, dep habarlaıdy Kazinform tilshisi oqıǵa ornynan.
8 mamyrǵa deıin jalǵasatyn chempıonatty Ázerbaıjannyń aspazdyq mamandar qaýymdastyǵy Memlekettik týrızm agenttigi men Ázerbaıjan ulttyq aspazdyq ortalyǵynyń qoldaýymen jáne Dúnıejúzilik aspazdar qoǵamy qaýymdastyǵynyń (Worldchefs) seriktestigimen uıymdastyrdy.
Іs-sharanyń basty maqsaty – eldegi gastronomııanyń damýyna yqpal etý, aspazdyq týrızmniń áleýetin keńeıtý, mamandardyń kásibı biliktiligin arttyrý, ulttyq taǵamdardy halyqaralyq deńgeıde nasıhattaý. Sheteldik aspazdarmen tájirıbe almasý.
Chempıonat baǵdarlamasyna aspazdardyń jeke sanattary, kondıterlik jarystar, komandalyq jarystar jáne jasóspirimder arasyndaǵy jarystar kiredi.
Bıyl ınnovatsııaǵa, turaqty damýǵa, ulttyq aspazdyq dástúrdi zamanaýı halyqaralyq trendtermen úılestirýge erekshe kóńil bólinedi.
Jarysqa Túrkııa, Qazaqstan, Ózbekstan, Pákistan, Serbııa, Reseı, Belarýs, Horvatııa, Rýmynııa, Ýkraına komandalary qatysyp jatyr.
Qatysýshylardyń jumysyn Amerıka Qurama Shtattary, Ulybrıtanııa, Shvetsııa, Italııa, Germanııa jáne basqa elderden turatyn sertıfıkattalǵan Worldchefs tóreshilerinen turatyn halyqaralyq qazylar alqasy baǵalaıdy.
Bıylǵy chempıonatta Qazaqstan namysyn «Qazaqstan aspazshylar haby», «Qazaqstan aspazdar qaýymdastyǵy» qurǵan ulttyq qurama qorǵaıdy.
Delegatsııa quramynda Qazaqstannan resmı ókil ári tóreshi Saıd Roşaev, komanda kapıtany Nursultan Ismaılov, ulttyq quramanyń bas aspazy Aıdarbek Saparhan jáne kondıter Erdáýlet Lespek bar.
«Golden Shah» chempıonaty 2019 jyldan beri ótkizilip keledi. 2024 jyldan bastap Worldchefs kompanııasymen birlesip uıymdastyrylatyn jarys kontınenttik aspazdar chempıonatyn ótkizý quqyǵyna ıe boldy. Bul baıqaýdyń halyqaralyq deńgeıin keńeıtýge jáne básekelestik deńgeıin joǵarylatýǵa múmkindik berdi.
Uıymdastyrýshylardyń aıtýynsha, chempıonat jańa talanttardy anyqtaýǵa, tájirıbe almasýǵa jáne Ázerbaıjannyń perspektıvaly gastronomııalyq baǵyt retinde ustanymyn nyǵaıtýǵa arnalǵan mańyzdy kásibı alań retinde qarastyrylady.
