Qazaqstandyq áskerı qyzmetshilerge shetelde oqý kezinde áýe bıletteriniń aqysy memleket esebinen tólenedi

Jańa ózgeristerge sáıkes, áskerı qyzmetshi sheteldik joǵary oqý ornynan keıingi bilim berý baǵdarlamalaryn iske asyratyn oqý ornyna oqýǵa qabyldanǵan kezde jáne oqýyn aıaqtaǵannan keıin, sondaı-aq ýákiletti organnyń joldamasymen sheteldik oqý oryndaryna qosymsha bilim berý baǵdarlamalary (biliktilikti arttyrý, qaıta daıarlaý, kýrstyq daıyndyq, kásibı jetildirý, mamandandyrý jáne ınternatýra) boıynsha jiberilgen jaǵdaıda, olardyń jol júrý shyǵyndary memleket esebinen óteledi.

Sonymen qatar áskerı qyzmetshi sheteldik áskerı oqý ornyna qabyldanǵan kezde jáne oqýyn aıaqtaǵannan keıin onyń jáne otbasy músheleriniń bagajy men qol júgin tasymaldaý shyǵyndary da memleket esebinen tólenedi. Aıta ketý kerek, bul tólem avıakompanııa ekonom-klass bıletiniń qunyna engizgen ruqsat etilgen bagaj jáne qol júgi normasy sheginde ǵana júzege asyrylady.

Al belgilengen salmaqtan artyq qosymsha bagaj nemese qol júgi úshin tólemdi áskerı qyzmetshiniń ózi tóleıdi jáne bul shyǵyndar memleket tarapynan ótelmeıdi.
Sheteldik áskerı oqý oryndaryna oqýǵa baratyn jáne oqýyn aıaqtap elge qaıtatyn áskerı qyzmetshiler men olardyń otbasy músheleriniń jol júrýin Qorǵanys mınıstrliginiń áskerı bilimge jaýapty qurylymdyq bólimshesiniń ótinimderi negizinde áskerı qatynas organdary uıymdastyrady.

Eger halyqaralyq sharttarda ózgeshe tártip kózdelmese, sheteldik oqý ornynda bilim alyp júrgen áskerı qyzmetshiniń Qazaqstanǵa taǵylymdamadan ótýge kelýi jáne keıin oqý ornyna qaıta oralýy da memleket esebinen áýe kóligimen qamtamasyz etiledi. Bul rette jol júrý baǵyty oqý ornynan áskerı qyzmetshi jiberilgen áskerı basqarý organynyń ornalasqan jerine deıin jáne taǵylymdamadan keıingi jóneltý pýnktinen oqý ornyna deıin júzege asyrylady.

Sheteldik oqý oryndarynda bilim alyp jatqan kýrsanttar men kadetterdiń kanıkýl kezindegi demalysqa baryp-qaıtý shyǵyndary, eger halyqaralyq sharttarda ózgeshe kózdelmese, memleket esebinen óteledi. Demalys Qazaqstan Respýblıkasynyń aýmaǵynda ótkizilgen jaǵdaıda, áýe kóligimen oqý ornynan demalys ornyna jáne keri qaıtý jolaqysy tólenedi.
Eger sheteldik oqý ornynda oqyp júrgen kýrsant taǵylymdamadan keıin Qazaqstan aýmaǵynda demalys ótkizip, odan ári oqý ornyna qaıtatyn bolsa, onda onyń demalys ornynan oqý ornyna deıingi jol júrýi de memleket esebinen áýe kóligimen qamtamasyz etiledi.

Qyzmettik issaparǵa jiberilgen áskerı qyzmetshilerdiń, sondaı-aq áskerı qyzmetshiler men olardyń otbasy músheleriniń demalysqa baryp-qaıtýy nemese jańa qyzmet ornyna aýysýyna baılanysty memlekettik avıatsııa áýe kemelerimen tasymaldanýyna ruqsat etiledi. Bul tek áýe kemesi bastapqy pýnktten sońǵy baǵytqa deıin ilespe baǵytta reıs oryndaǵan jaǵdaıda ǵana júzege asady. Mundaı tasymaldaýǵa negiz retinde joǵary qolbasshylyqtyń buıryqtary men nusqaýlary alynady.

Sonymen qatar qaǵıdalar jańa tarmaqpen tolyqtyryldy. Oǵan sáıkes, áskerı qyzmetshiniń jol júrýine arnalǵan baıanat Áýe qorǵanysy kúshteri Áskerı-áýe kúshteriniń qolbasshysyna joldanýy tıis. Baıanatta jol júrý maqsaty kórsetilip, ony qurylymdyq bólimsheniń tikeleı basshysy qol qoıýy qajet.

Áýe kemesine otyrǵyzý aldynda mynadaı qujattar usynylýy tıis:

Áskerı qyzmetshi: ushý maqsatyn rastaıtyn qujat (issapar kýáligi, demalys bıleti, jańa qyzmet ornyna aýysý týraly nusqama, áskerı-dárigerlik komıssııaǵa nemese gospıtalızatsııaǵa joldama, aýrýhanadan shyǵarylǵany týraly epıkrız);

Áskerı qyzmetshiniń otbasy músheleri: jeke basyn kýálandyratyn qujat jáne týystyq qatynasty rastaıtyn qujat.

Rastaıtyn qujattar bolmaǵan jaǵdaıda áskerı qyzmetshiler men olardyń otbasy múshelerin tasymaldaýǵa jol berilmeıdi.

Sondaı-aq memlekettik avıatsııa áýe kemelerimen áskerı qyzmetshi men onyń otbasy múshelerin bólek-bólek tasymaldaýǵa ruqsat etilmeıdi.

Atalǵan buıryq 2026 jylǵy 15 tamyzdan bastap kúshine enedi.

Aıta keteıik, elimizde áskerı oqý oryndaryna túsýdi qalaıtyn jastar sany artyp keledi.