Qazaqstandyq áskerı qyzmetshiler BUU-nyń 7 mıssııasynda mindetin atqaryp júr
ASTANA. KAZINFORM - Búgin – Qazaqstan Respýblıkasynyń Bitimger kúni. Bıyldan bastap elimizde bekitilgen bul kásibı mereke BUU-nyń Halyqaralyq bitimgerler kúnimen tuspa-tus kelip otyr, dep habarlaıdy QR Qorǵanys mınıstrliginiń bapasóz qyzmeti.
BUU-nyń bitimgerlik qyzmetine qatysý – Qazaqstannyń syrtqy saıasatynyń mańyzdy baǵyttarynyń biri. Bul elimizdiń halyqaralyq bedelin nyǵaıtyp, álemdik qaýymdastyq tarapynan senimdi arttyrýǵa yqpal etedi.
Halyqaralyq mindettemelerdi iske asyrý aıasynda 2014 jyldan beri 900-den asa áskerı qyzmetshi BUU-nyń túrli mıssııalary quramynda qyzmet atqardy.
Qazirgi tańda 154 qazaqstandyq áskerı qyzmetshi Taıaý Shyǵys pen Afrıka qurlyǵyndaǵy BUU-nyń 11 mıssııasynyń 7-ýine qatysýda. Bitimgerler Batys Saharada, Ortalyq Afrıka Respýblıkasynda, Kongo Demokratııalyq Respýblıkasynda, Lıvan Respýblıkasynda jáne Ońtústik Sýdanda áskerı baqylaýshy jáne shtab ofıtserleri retinde qyzmet atqaryp júr.
Qorǵanys mınıstrligi Memleket basshysynyń qazaqstandyq bitimgerlerdiń BUU mıssııalaryna qatysý aýqymyn keńeıtý jáne ony ártaraptandyrý jónindegi tapsyrmasyn júıeli túrde júzege asyryp keledi.
Osylaısha, 2024 jyldan bastap ulttyq kontıngent Golan jotalaryndaǵy «BUU-nyń bólingen aýmaqty baqylaý jónindegi kúshteri» mıssııasy aıasynda mindetterin oryndaýda. Kontıngentti ornalastyrý aldynda áskerı qyzmetshiler BUU standarttaryna sáıkes keshendi daıarlyq pen baǵalaýdan ótti.
Mıssııa atqarý úshin qyzmetke qajetti jabdyqtarymen, zamanaýı qarý-jaraq jáne áskerı tehnıka úlgilerimen jan-jaqty qamtamasyz etý boıynsha keshendi jumystar iske asyryldy. Áskerı qyzmetshilerdi daıarlaý Qorǵanys mınıstrligi Bitimgerlik operatsııalar ortalyǵynyń bazasynda júrgiziledi. Bitimgerler halyqaralyq gýmanıtarlyq quqyqty, aǵylshyn tilin, áskerı medıtsınany, mınasyzdandyrý negizderin meńgerip, patrýldeý men tosqaýyl beketterinde qyzmet atqarý mashyqtaryn pysyqtaıdy.
Qazaqstan BUU-dan bitimgerlik mıssııaǵa qatysýǵa derbes mandat alǵan postkeńestik keńistiktegi alǵashqy ári jalǵyz memleket.
Golan jotalarynda alǵashqy ulttyq kontıngenttiń ornalastyrylýy Qarýly kúshterimizdiń quzyrettiligi, jaýapkershiligi jáne joǵary daıyndyq deńgeıiniń halyqaralyq deńgeıde moıyndalǵanynyń aıqyn dáleli boldy.
Mıssııa qolbasshylyǵy da óz tarapynan qazaqstandyq áskerı qyzmetshilerdiń joǵary kásibıligi men bitimgerlik qyzmetke qosqan úlesin joǵary baǵalady.
Aıta keteıik, osyǵan deıin Dýshanbede qazaqstandyq bitimgerlerge arnalǵan estelik buryshy ashylǵan bolatyn.
