Qazaqstandyq áskerı qyzmetshiler álem chempıonatynda altyn men kúmis oljalady
ASTANA. KAZINFORM — Arnaıy operatsııalar kúshteriniń ókilderi Aqtaýda jastar arasynda ótken qoıan-qoltyq urystan álem chempıonatynda sátti óner kórsetti. Bul týraly QR Qorǵanys mınıstrligi habarlady.
«Halyq Arena» sport kesheninde ótken álem birinshiligine 23 elden 250-den astam jas sportshy qatysty.
Jekpe-jekte tatamıge shyqqan áskerı qyzmetshiler altyn men kúmis medal enshiledi.
— Ofıtser-mergen leıtenant Darhan Joraǵul 97 keli salmaqta altyn ıelense, 88 keli salmaqta top serjanty — dene shynyqtyrý jáne jaýyngerlik daıarlyq boıynsha nusqaýshy serjant Azamat Asylbekuly ekinshi satysynan kórindi, — delingen aqparatta.
Darhan Joraǵul Qurlyq áskerleriniń áskerı ınstıtýtynda oqyp júrgen kezden beri sportpen shuǵyldana bastady. Ol 2021 jáne 2024 jyldardaǵy jastar arasyndaǵy halyqaralyq týrnırlerdiń jeńimpazy.
Serjant Azamat Asylbekuly qoıan-qoltyq urystan 4 dúrkin el chempıony, Qazaqstan Kýbogy jáne armııalyq qoıan-qoltyq urystan TMD chempıony.
Sondaı-aq batýttyq gımnastıkadan qazaqstandyqtar Álem kýbogy kezeńinde chempıon atandy.