Qazaqstandyq áskerı qyzmetshi AQSh-ta rekord ornatty
ASTANA. KAZINFORM — Qazaqstan Qarýly kúshteriniń komandasy Arızona shtatyndaǵy Kemp Navaho áskerı bazasynda jyl saıyn ótetin Best worrier baıqaýyna qatysyp jatyr. Bul týraly Qorǵanys mınıstrligi habarlaıdy.
Qazaqstannyń namysyn ótken jyly kásibı saıysta júldeli oryndarǵa ıe bolǵan 54835-A áskerı bólimi batalonynyń serjanty 3-synypty serjant Aslan Darhan men 18404 áskerı bólimi rotasynyń 3-synypty gvardııa serjanty Raýan Toqtarbekov qorǵap jatyr.
18 mamyrǵa deıin sozylatyn baıqaýǵa AQSh-tyń 7 shtatynan, Fıdjı, Gýam, Tonga jáne Fılıppınnen kelgen áskerı qyzmetshiler saıysady. Arızona Ulttyq gvardııasy jyl saıyn Best worrier baıqaýyn ótkizip, onda áskerı qoldanbaly pánderden úzdik dep tanylǵan serjanttardy anyqtaıdy.
Jarys armııalyq jaýyngerlik fıtnes testi, jaýyngerlik daıarlyqty oqytý pánderinen normatıvterdi oryndaý, túngi kúzet, kartamen jumys, aımaqty baǵalaý jáne azımýt boıynsha qozǵalys, jergilikti jerdi patrýldeý, taktıkalyq medıtsına, M-240V pýlemetinen, M-4 avtomatynan, M-17 tapanshasynan atý, arnaıy áskerı saýytpen jáne 12 keli júkpen 22 shaqyrymǵa marsh júgirý syndy 10 negizgi jarystan turady.
Dúbirli dodada AQSh armııasynyń qarý-jaraǵymen jáne quraldarynda jattyǵýlar men normatıvterdi oryndasa da bizdiń áskerı qyzmetshiler tamasha nátıjeler kórsetip jatyr.
Naqtyraq aıtsaq, 3-synypty serjant Darhan Aslan 800 metrge júgirýde qashyqtyqty 2 mınýt 5 sekýndta eńserip, úzdik nátıje kórsetti. Ol kórsetken nátıje Arızona shtatynyń Ulttyq gvardııa baıqaýy tarıhyndaǵy rekord retinde tirkeldi.
Aıta keteıik, mamyrda Prezıdent áskerı qyzmetshilerge memlekettik nagradalar tapsyrdy.