Qazaqstandyq arnaıy jasaq týraly fılm kórermenge jol tartty
Búgin, 2 qarashadan bastap elimizdiń barlyq kınoteatrynda memleket qaýipsizdigi men el turǵyndarynyń ómirine asa qater tóndiretin qylmystarǵa qarsy jedel áreket etetin «Burkit» arnaıy jasaǵy týraly fılm prokatqa shyqty, dep habarlaıdy Kazinform.
«Burkit» – arnaıy jasaqta qyzmet etetin úsh dostyń hıkaıasy. Olardyń kúndelikti mindeti – qaýipti qylmystyq toptarǵa qarsy turý. Osyndaı qarama-qaıshylyqtarǵa qaramaı, olarǵa dostyqqa adaldyqty synaý mindeti de tur.
Fılm túsirilimine arnaıy jasaq, áskerı tehnıka jáne avıatsııa, sondaı-aq eki júzden astam belsendi áskerı qyzmetshi qatysqan. Jedel-izdestirý sharalary arqaý bolǵan kartınanyń keıbir epızodtary shynaıy oqıǵalarǵa negizdelgen. Túsirilim jumystary Almaty oblysynda, Qonaev qalasynda, Esik kóliniń taýlarynda jáne Іle ózeni boıynda ótti.
Ulttyq kınony qoldaý memlekettik ortalyǵy basqarma tóraǵasynyń aıtýynsha, qazirgi kórermenderdiń suranys, talǵamy jan-jaqty. Sondyqtan kórermenge ártúrli janrdaǵy, osyndaı túrli trıýkqa toly ekshn fılmderdi de usynǵan jón. Fılmde «Búrkit» arnaıy jasaǵynyń sarbazdary «kúreń beret» kııý quqyǵyna ıe bolý úshin synǵa túsedi.
«Elimizde búgingi kúnge 200-ge jýyq «kúreń beret» ıegeri bar eken. Kúreń beret kııý mártebesine arnalǵan biliktilik synaǵynan ótý – jaýyngerlik rýhtyń belgisi. Sondyqtan jańa fılmimiz jastardy Otanǵa degen adaldyq pen rııasyz mahabbatqa tárbıeleıdi dep senemiz» - dedi Qurmanbek Jumaǵalı.
Fılmniń rejısseri – Danııar Ibragımov, ol úshin bul kartına debıýttik jumys. Buǵan deıin Danııar «Qazbat» jáne «Altynshy beket» áskerı fılmderinde prodıýser retinde qyzmet etken. Sol sebepti tájirıbeli maman týyndyny túsirý oǵan qıyndyq týdyrmaǵanyn aıtty.
Fılmge Dáýren Serǵazın, Sanjar Mádı, Asylhan Tólepov, Gúlnáz Jolanova, Ásel Saǵatova, Jandos Aıbasov jáne Azamat Satybaldy sııaqty elimizdiń tanymal akterleri tústi. Sonymen birge tanymal mýzykant Ǵalymjan Moldanazar da antagonıst keıipkerdiń rólin somdap shyqty. Basty róldegi akterler túsirilim jumystaryna kirispes buryn birneshe apta boıy jaýyngerlik oqý-jattyǵýlaryna qatysyp, taktıkalardy úırendi.
«Fılmge túsý úshin biz arnaıy normatıvterdi tapsyrdyq. Shynaıy sarzbazdardan esh aıyrmashylyǵymyz bolmady. 30 keliden aýyr formany kıip júrdik. Bir epızodtyń túsirilimi kezinde arqamdy ońbaı jaraqattap aldym. Bir apta boıy em alýyma týra keldi. Kaskader bolǵandyqtan barlyq trıýkti ózim jasaýǵa tyrystym» - deıdi fılm akteri Sanjar Mádı.
«Burkit» ekshn fılmi 2 qarashadan bastap barlyq kınoteatrlarda qazaq jáne orys tilderinde shyǵady.
