Qazaqstandyq arnaıy jasaq halyqaralyq týrnırde top jardy
ASTANA. KAZINFORM — Dýbaıda álemniń úzdik arnaıy bólimshelerin biriktirgen UAE SWAT CHALLENGE-2026 halyqaralyq týrnıri aıaqtaldy.
Bes básekeli kún ishinde álemniń 48 elinen 109 komanda is-árekettiń sheberligin, jyldamdyǵyn, taktıkalyq oılaýyn jáne úılesimdiligin barynsha kórsetti.
Qazaqstan quramasyna elimizdiń kúsh qurylymdarynan quralǵan «Kazakhstan A», «Kazakhstan B», «Kazakhstan C», «Kazakhstan D» komandalary jáne «Kazakhstan Tomiris» áıelder komandasy qatysty.
Aıta keteıik, Іshki ister mınıstriniń tapsyrmasy boıynsha Іshki ister mınıstriniń orynbasary — Ulttyq ulannyń Bas qolbasshysy general-maıor Ańsaǵan Baltabekov Dýbaıda bolyp, áskerı qyzmetshilerge qoldaý kórsetip, óz tájirıbesi men taǵylymyn bólisti.
Jarystyń besinshi kúninde qatysýshylar eń serpindi kezeńderdiń biri — Obstacle Course (kedergiler jolaǵyn) baǵyndyrdy. Osy kezeńniń qorytyndysy boıynsha «Kazakhstan B» komandasy І oryn ıelendi, al «Kazakhstan A» besinshi orynǵa jaıǵasyp, úzdik bestikke kirdi.
Týrnırdiń basty jańalyǵy «Kazakhstan S» komandasynyń tamasha jeńisi boldy, ol barlyq jarys kúnderiniń qorytyndysynda UAE SWAT CHALLENGE-2026 týrnıriniń jeńimpazy atandy.
Jalpy reıtıngte ekinshi oryndy «Kazakhstan A» komandasy jeńip aldy.
Sonymen qatar qorytyndy kestede qazaqstandyq komandalar arasynda pozıtsııalar kelesideı bólindi:
* «Kazakhstan B» — 8 oryn;
* «Kazakhstan Tomiris» — 18 oryn;
* «Kazakhstan D» — 20 oryn.
Qazaqstandyq komandalardyń jeńisi men júldeli oryndary — otandyq arnaıy maqsattaǵy bólimshelerdiń joǵary jaýyngerlik daǵdylarynyń, dene daıyndyǵy men kásibıliginiń kórsetkishi. UAE SWAT CHALLENGE-2026-da sátti óner kórsetý Qazaqstannyń halyqaralyq bedelin nyǵaıtty jáne bizdiń jaýyngerlerimizdiń álemdik arenada básekege qabilettiligin kórsetti.
Aıta ketelik Qazaqstandyq arnaıy jasaq halyqaralyq týrnırde úzdik ondyqqa engeni týraly jazǵan edik.