Qazaqstandyq arnaıy jasaq Dýbaıdaǵy týrnırde kósh bastady
ASTANA. KAZINFORM – Dýbaıda álemniń quqyq qorǵaý organdarynyń arnaıy bólinisteri arasynda halyqaralyq SWAT Challenge-2026 týrnıri jalǵasyp jatyr, dep habarlady polisia.kz.
Bıyl jarysqa 109 komanda qatysyp, taktıkalyq, fızıkalyq jáne atys daıyndyǵynyń joǵary deńgeıin kórsetip jatyr.
Týrnırde Qazaqstan atynan bes komanda qatysyp jatyr. Úshinshi jarys kúniniń qorytyndysy boıynsha qazaqstandyq komandalar joǵary nátıjege ıe boldy.
Jalpy esepte Kaz SWAT Team C komandasy 1-orynǵa kóterilip, absolıýtti kóshbasshy atandy. Al Kaz SWAT Team A 2-orynda. Qalǵan komandalardyń kórsetkishteri de kóńil qýantady: Kaz SWAT Team Tomiris - 14-oryn, Kaz SWAT Team B - 16-oryn, Kaz SWAT Team D - 22-oryn.
Aıta keterligi, Kaz SWAT Team Tomiris komandasy áıelder komandalary arasynda kósh bastap tur. Qazaqstandyq komandalar SWAT Challenge-2026 týrnırinde otandyq arnaıy bólinisterdiń joǵary kásibıligin jáne halyqaralyq arenada básekege qabilettiligin aıqyn dáleldep jatyr.
Birikken Arab Ámirlikteriniń Dýbaı qalasynda ótip jatqan UAE SWAT Challenge halyqaralyq týrnıriniń birinshi kúninde Qazaqstannyń arnaıy jasaq komandalary sátti óner kórsetip, úzdik ondyqqa engenin jazǵan bolatynbyz.