Qazaqstandyq arheologter Pavlodar oblysynan saq dáýirine tıesili qola pyshaqtar tapty

ASTANA. KAZINFORM — Marǵulan ýnıversıtetiniń arheologtary men stýdentteri Pavlodar oblysynyń Baıanaýyl aýdanynda saq dáýirine tıesili eki qola pyshaq tapty. Qundy jádigerler Toraıǵyr kóliniń mańyndaǵy qorǵannan jazǵy dalalyq tájirıbe kezinde anyqtaldy.

Arheologııalyq qorlardyń bas saqtaýshysy Elena Týshevanyń aıtýynsha, bul zattar «Toraıǵyr-6» eskertkishinde júrgizilgen qazba jumystary barysynda tabylǵan. Sonymen qatar mamandar «Toraıǵyr-7» atty jańa qorǵandy da anyqtaǵan.

– Biz eki qorǵandy qazý kezinde saq dáýiriniń erte kezeńine jatatyn, qoladan quıylǵan pyshaqtar taptyq. Bul – Pavlodar oblysy úshin sırek kezdesetin arheologııalyq olja, – dedi Elena Týsheva.

Mamannyń málimdeýinshe, pyshaqtar kóne tehnologııa boıynsha jasalǵanymen, stılıstıkasy erte temir dáýirine jatady. Bul – óńirde metallýrgııalyq sheberlik pen mádenı baılanystardyń joǵary deńgeıde damyǵanyn kórsetedi.

Arheologtar sondaı-aq bul mańnan Tasmola mádenıetine tıesili adam qaldyqtaryn da anyqtaǵan.

– Qańqa súıekter jaqsy saqtalǵan, bul bizge jynysy, jasy jáne antropologııalyq sıpattamalaryn anyqtaýǵa múmkindik berdi. Qabattardy tereńirek tazalaý barysynda Andronov mádenıetine jatatyn qabirlerdi de taptyq, – dedi «Tarıh» mamandyǵynyń stýdenti Angelına Grışenko.

Aıta keteıik, Marǵulan ýnıversıteti Baıanaýyl aımaǵynda arheologııalyq zertteýlerdi on jyldan astam ýaqyt boıy júıeli túrde júrgizip keledi. Búginde oqý orny óńirdegi negizgi tarıhı-mádenı mura nysandarynyń saqtalýyna atsalysýda.

Buǵan deıin almatylyq arheologter saq dáýirine tıesili altyn júzik tapqan.