Qazaqstandyq ánshi «Slavıan bazarynda» birinshi oryn aldy
ASTANA. KAZINFORM — Qazaqstandyq ánshi Aqerke Amalıat Vıtebsk qalasyndaǵy «Slavıan bazarynda» ótken XXXV Halyqaralyq estradalyq án oryndaýshylary baıqaýynda birinshi oryn aldy.
Qazylar alqasy eki kúnniń qorytyndysy boıynsha onyń ónerine 134 upaı berdi.
— «Slavıan bazary» baıqaýynyń sahnasyna alǵash ret 15 jasymda shyqtym. Bul uzaq sapar boldy. Birinshi oryn alǵanyma jáne elge jeńispen oralatynyma óte qýanyshtymyn, — dedi Aqerke Amalıat.
Qazaq ánshisi Gran-prı ıegeri, 135 upaı jınaǵan ıtalııalyq Soraıadan bir upaı ǵana artta qaldy.
Ekinshi oryndy Belarýs ánshisi Elena Kýznetsova men Moldova ánshisi Alekseı Osıchev bólisti.
Úshinshi oryndy eki qatysýshy ıelendi: qyrǵyzstandyq Nurdoolot Derkembaev pen grýzııalyq Vaja Gadelııa.
Bıyl bas júlde úshin 19 eldiń ókilderi baq synasty. Birinshi kezeńde jas ártister «mınýs 1» jazbasymen álemdik hıt ánderdi oryndady.
Ekinshi kúni qatysýshylar Ulttyq Prezıdent Orkestriniń súıemeldeýimen slavıan tilinde shyǵarma usyndy.
1992 jyldan bastap «Vıtebskidegi Slavıan bazary» halyqaralyq óner festıvali jyl saıyn shilde aıynyń ortasynda ótkizilip keledi jáne TMD men Shyǵys Eýropadaǵy eń bedeldi mádenı forýmdardyń biri sanalady.
Buǵan deıin «Slavıan bazarynyń» júldegeri Jasmına Túzelova aldaǵy maqsaty týraly aıtqan edi.
