Otandyq ánshi «Novaıa volna — 2025» baıqaýynda jeńiske jetti
ASTANA. KAZINFORM — Otandyq ónerpaz Alex Lim halyqaralyq deńgeıdegi bedeldi «Novaıa volna — 2025» mýzykalyq baıqaýynda top jaryp, bas júldeni jeńip aldy.
Bul týraly jańalyqty ánshi óziniń Instagram-daǵy paraqshasynda jarııalady. Onda ádilqazylar tóraǵasy Igor Krýtoı baıqaý nátıjelerin qorytyndylap, qazaqstandyq ánshiniń jeńiske jetkenin habarlaıdy.
Alex Lim baıqaý barysynda birneshe stılde án oryndap, kórermender men qazylar alqasynyń ystyq yqylasyna bólendi. Nátıjesinde ol joǵary upaı jınap, baıqaýdyń jeńimpazy atandy. Aleksandr Lım 33 jasta, Almaty qalasynda turady.
Aıta keteıik, «Novaıa volna» — TMD aýmaǵyndaǵy eń iri ári yqpaldy mýzykalyq baıqaýlardyń biri, ol jas talanttarǵa halyqaralyq sahnaǵa jol ashady. Bıylǵy baıqaý Tatarstan Respýblıkasynyń astanasy — Qazan qalasynda ótti. Oǵan álemniń túkpir-túkpirinen kelgen jas oryndaýshylar qatysty.
Budan buryn Qazan qalasyndaǵy halyqaralyq ánshiler baıqaýyna qazaqstandyq Danıal Jumaqanovtyń (Jummy) da qatysyp jatqany anyqtaldy.