Qazaqstandyq alty boksshy Strandja týrnırinde jarysty jalǵastyrady

ASTANA. KAZINFORM - Bolgarııa astanasy Sofııa qalasynda ótip jatqan halyqaralyq Strandja týrnıriniń úshinshi jarys kúni máresine jetti.

Bul kúni el quramasynan jeti bylǵary qolǵap sheberi sharshy alańǵa shyǵyp, onyń altaýy jarysty jalǵastyrýǵa múmkindik aldy. 

Keshki sessııada otandasymyz Laýra Esenkeldi AQSh ókili Merı-Endjelıs Rosendony 5:0 esebimen tize búktirdi.

Oǵan deıin belgilengen eki jekpe-jektiń ótpeıtini anyqtaldy. Qazaqstandyq Arýjan Jańabaeva (65 keli) jaraqatyna baılanysty Navbahor Hamıdovamen (Ózbekstan) kezdesýden bas tartty.

Sondaı-aq Danıal Saparbaı (90 keliden joǵary) jekpe-jekten bas tartýyna baılanysty Nurlan Saparbaı avtomatty túrde shırek fınalǵa shyqty.

Qazaqstandyq bylǵary qolǵap sheberleri arasynan kúndizgi sessııada áıelder arasynda 57 kelide Uljan Sársenbek taǵy bir otandasymyz Aıdana Zabynbekovany, Azııa chempıony Rımma Volosenko (60 keli) AQSh ókili Alısha Kroketti 5:0, 60 kelide Vıktorııa Grafeeva túrkııalyq Gızem Ozerdi 4:1 esebimen jeńdi.

Al Jazıra Oraqbaeva 1/8 fınalda 2025 jylǵy álem chempıonatynyń qola júldegeri Ferýza Kazakovaǵa 0:5 esebimen ese jiberip, jarys jolynan shyǵyp qaldy.

Aıta ketsek, Qazaqstan Bolgarııa astanasyna 39 boksshyny attandyrdy. Bıyl Strandja kýbogy 77-márte ótkizip jatyr. Bul týrnır Eýropa qurlyǵyndaǵy tarıhy tereń sporttyq jarys sanalady.