Qazaqstandyq alpınıst dombyra men el Konstıtýtsııasyn Pamır shyńyna alyp shyqty
ASTANA. KAZINFORM — Qazaqstandyq alpınıst, mýzykant, Qalıbek Qýanyshbaev atyndaǵy Qazaq ulttyq mýzykalyq-drama teatrynyń ártisi Álibek Qaıyrbek Pamır taý júıesindegi bıiktigi 6 148 metr bolatyn Razdelnaıa shyńyna Qazaqstan Respýblıkasynyń qoldanystaǵy Konstıtýtsııasy men qazaqtyń dombyrasyn alyp shyqty.
Konstıtýtsııalyq sottyń baspasóz qyzmetiniń habarlaýynsha, bul ekspedıtsııa Qazaqstandy, onyń mádenıetin, memlekettik rámizderi men ulttyq qundylyqtaryn halyqaralyq deńgeıde nasıhattaýǵa baǵyttalǵan «Álem shyńdaryndaǵy dombyra» halyqaralyq mádenı-patrıottyq jobasy aıasynda júzege asyryldy.
— Joba aıasynda Álibek Qaıyrbek Eýropa, Afrıka, Gımalaı, Tıan-Shan jáne Pamırdiń eń bıik shyńdaryna kóterilip, qazaqtyń kúı ónerin álemge tanytyp keledi. Árbir ekspedıtsııa Qazaqstan Respýblıkasyn laıyqty tanystyrýǵa, qazaq halqynyń baı tarıhy, mádenıeti, salt-dástúri men jetistikteri týraly halyqaralyq qaýymdastyqqa keńinen aqparat berýge múmkindik beredi, — delingen habarlamada.
Razdelnaıa shyńynda Álibek Qaıyrbek dombyramen qazaq kúılerin oryndap, Qazaqstan Respýblıkasynyń qoldanystaǵy Konstıtýtsııasyn kóterdi. Halyqaralyq ekspedıtsııalar barysynda ol ártúrli memleketterden kelgen alpınısterge Qazaqstannyń tarıhy, mádenıeti, memlekettik rámizderi jáne elimizdiń Ata Zańy týraly tanystyrady.
2025 jyly Qazaqstan Respýblıkasy Konstıtýtsııasynyń 30 jyldyǵyna oraı Álibek Qaıyrbek tarıhta tuńǵysh ret Konstıtýtsııany Gımalaıdaǵy Aılend-Pık shyńyna alyp shyqqan edi. Al 2026 jyly ol osy patrıottyq dástúrdi jalǵastyryp, Qazaqstan Respýblıkasynyń qoldanystaǵy Konstıtýtsııasyn Pamır shyńyna kóterdi.
Eske salaıyq, buǵan deıin qazaqstandyq Anar Býrasheva álemdegi eń bıik jeti shyńdy baǵyndyrǵanyn habarlaǵan edik.
