Qazaqstandyq Alaqan bıometrııa qyzmeti shetel naryǵyna shyǵady

ASTANA. KAZINFORM –  Alaqan qazaqstandyq bıometrııalyq servısi Shanhaıdaǵy VII Qytaı halyqaralyq ımport kórmesinde tanystyryldy. Biregeı jobanyń avtorlary qytaılyq kásipkerlermen, sondaı-aq basqa elderdiń seriktesterimen jańa baılanys ornatýǵa nıetti. Bul týraly Úkimettiń baspasóz qyzmeti habarlady.

Alaqan – bul qaýipsiz ári yńǵaıly tólemder, qol jetkizýdi baqylaý jáne derekterdi esepke alý úshin alaqan tamyrlarynyń sýreti boıynsha jeke tulǵany sáıkestendirý salasynda paıdalanatyn ınnovatsııalyq bıometrııalyq júıe.

Tehnologııa kartalardy, qolma-qol aqshany nemese mobıldi qurylǵylardy qajet etpesten tólem jasaýǵa jáne avtorızatsııalaýǵa múmkindik beredi, bul ınfraqurylymmen baılanyssyz ári qorǵalǵan ózara árekettesý ádisin qamtamasyz etedi.

«Bul júıe adamǵa áreket erkindigin beredi. Bizdiń júıemiz qazirdiń ózinde mektepterde qoldanylyp keledi jáne Alaqan Mektep ekojúıesi retinde belgili. Onyń arqasynda bala alaqanynyń kómegimen mektepke kiredi, tamaq satyp alady, kitaphanadan kitap alady, shkafyn ashady jáne munyń bárin ata-analar baqylaı alady. Búgingi tańda Alaqan Mektep júıesi birneshe óńirdiń oqý oryndarynda engizildi, qazirdiń ózinde 300-ge jýyq mektep qosyldy. Biz shetelde arab elderinde de jobamyzdy usyndyq. Onda bizdiń ázirlememiz tólem júıesi retinde qoldanylady. Erteń biz Sıngapýrǵa ushqaly otyrmyz, ıaǵnı, Ońtústik-Shyǵys Azııa naryǵyn ıgeremiz», — dep atap ótti Alaqan kompanııasynyń negizin qalaýshy Berik Nurymbetov.

Buǵan deıin jolaýshylar elorda áýejaıynda bıometrııalyq sáıkestendirýden ótetinin jazǵan bolatynbyz.