Qazaqstandyq akter Nıý-Iorkte marapatqa ıe boldy

ASTANA. KAZINFORM — «Shatyrdaǵy ekeý» fılmi Nıý-Iorktegi Oniros Film Awards® halyqaralyq kınopremııasynda eki nomınatsııa enshiledi, dep habarlaıdy Ulttyq kınony qoldaý ortalyǵy.

Fılmde aýtızmge shaldyqqan jasóspirim Kostıanyń rólin somdaǵan Aleksandr Cherepanov «Jas akter» nomınatsııasyn aldy. Sonymen qatar Gúlshat Smaǵulova «Rejısser-debıýtant» atalymy boıynsha fınalıster qatarynan tabyldy.

Túsirilim kezinde nebári 15 jasta bolǵan Aleksandr Cherepanov Vıtalıı Davydovtyń sheberhanasynda akterlik qyryn shyńdap júr jáne qazir «Balaganchık» teatrynda óner kórsetedi. Sonyń arqasynda onyń fılmdegi róli de áserli shyǵyp, kórermen yqylasyna bólendi, festıvaldaǵy qazylar alqasynyń oń baǵasyn aldy.

«Shatyrdaǵy ekeý» fılmi — 15 jyldan astam tájirıbesi bar rejısser Gúlshat Smaǵulovanyń jumysy. Fılmniń stsenarıı avtory — Janna Tımofeeva, qoıýshy sýretshisi — Elena Aıtova, al qoıýshy operatory — Aleksandr Plotnıkov. Kınoda Eldar Ábish, Aleksandr Cherepanov, Lıdııa ıArtseva (Reseı), Olga Landına, Evgenıı Zadorojnev, Janna Qýanysheva, Dáýlet Kekilbaev, Baǵlan Núrekenova sııaqty jas ári tanymal akterler oınaıdy.

Ótken jyly fılm qazaq jáne orys tilderinde prokatqa shyqqan. Shyǵarmashylyq top kartınada ınklıýzııanyń mańyzyn jáne erekshe balalardyń qoǵamǵa beıimdelý máselesin kótergen.

Buǵan deıin habarlanǵandaı, qazaqstandyq «Shatyrdaǵy ekeý» fılmi Úndistandaǵy kınofestıvalde jeńimpaz atandy.