Qazaqstandyq ákelerdiń 60,4%-y otbasyna ýaqyt jetpeıtinin moıyndady
ASTANA. KAZINFORM – Qazaqstandyq qoǵamdyq damý ınstıtýtynyń zertteýleri elimizde ákelerdiń bala tárbıesine belsendi aralasa bastaǵanyn kórsetti.
Qazaqstandyq qoǵamdyq damý ınstıtýtynyń Halyqaralyq ákeler kúnine oraı jarııalanǵan zertteý nátıjelerine sáıkes, er azamattardyń 82,7%-y bala tárbıesin ata-ananyń birlesken mindeti dep sanaıdy.
Saýalnamaǵa qatysqan erlerdiń 78,7%-y balalarymen qarym-qatynasy burynǵyǵa qaraǵanda senimdirek bola túskenin aıtqan.
Zertteý derekteri boıynsha qazaqstandyq otbasylarda ata-analyq mindetterdi bólisý tájirıbesi de keń taralyp keledi. Máselen, respondentterdiń 72,3%-y balalardyń bos ýaqytyn uıymdastyrýǵa qatysatynyn, 71,9%-y balalarymen birge serýendeıtinin, 62,8%-y olardy úıirmeler men sport sektsııalaryna aparatynyn kórsetken.
Sonymen qatar er azamattardyń 60,4%-y jumysbastylyq saldarynan otbasyna jetkilikti ýaqyt bóle almaıtynyn moıyndaǵan.
Zertteý qarjylyq jaýapkershilikti bólisý úrdisiniń de kúsheıgenin kórsetti. Saýalnamaǵa qatysqandardyń 45,8%-y otbasylyq bıýdjetti erli-zaıyptylar birlesip qalyptastyratynyn aıtqan. Al 50,4%-ynda negizgi asyraýshy rólin er adam atqarady.
«Qazaqstandyq ákelerdiń asyraýshy rólinen bala tárbıesine belsendi aralasatyn áke jáne tálimger róline kóshý úrdisi baıqalady», – delingen zertteý qorytyndysynda.
Zertteýler Qazaqstandyq qoǵamdyq damý ınstıtýtynyń «Qazaqstan otbasylary» jáne «Berekeli otbasynyń qalyptasýyna áser etetin faktorlar» taqyryptaryndaǵy áleýmettanýlyq saýalnamalary negizinde júrgizilgen.
Aıta keteıik, Ákeler forýmynda bala tárbıesindegi ákeniń róli talqylandy.
