Qazaqstandyq agrosala mamandary Qytaıda zamanaýı tehnologııalardy úırenedi
ASTANA. KAZINFORM — QR Aýyl sharýashylyǵy mınıstrliginiń qyzmetkerleri QHR-da zamanaýı agrotehnologııalar men agroónerkásiptik keshendi basqarý boıynsha oqýdan ótedi.
Qyrkúıek aıynda Qytaıda QRAýyl sharýashylyǵy mınıstrligi men onyń aýmaqtyq bólimsheleriniń mamandaryna arnalǵan birqatar oqytý semınary ótedi. Oqytý QR AShM men QHR Kommertsııa mınıstrligi arasyndaǵy ekijaqty yntymaqtastyq aıasynda uıymdastyrylyp otyr.
Baǵdarlama alty beıindi oqý kýrsyn qamtıdy. Qazaqstandyq mamandar aýyl sharýashylyǵyn tsıfrlandyrý, memlekettik kórsetiletin qyzmetterdi jańǵyrtý, agrarlyq saıasatty ázirleý jáne iske asyrý, aýyldyq aýmaqtardy damytý, sondaı-aq agroónerkásiptik keshenge ınnovatsııalardy engizý baǵyttaryndaǵy Qytaı tájirıbesin zerdeleıdi.
Oqý baǵdarlamasynyń jekelegen baǵyttary shóleıttenýge qarsy kúres jáne ekologııalyq eginshilik, qus sharýashylyǵyn jańǵyrtý, veterınarııalyq baqylaý jáne tamaq ónimderiniń qaýipsizdigin qamtamasyz etý, mal sharýashylyǵy ınfraqurylymyn damytý, sondaı-aq sorttardy synaqtan ótkizý máselelerine arnalǵan.
Qazaqstandyq delegatsııa quramynda QR Aýyl sharýashylyǵy mınıstrligi salalyq departamentterdiń jas sarapshylary, sondaı-aq Almaty qalasy men Aqtóbe, Qyzylorda jáne Túrkistan oblystaryndaǵy AÓK-degi memlekettik ınspektsııalar komıtetiniń aýmaqtyq ınspektsııalarynyń mamandary bar.
— Biz úshin halyqaralyq yntymaqtastyqtyń naqty tájirıbesi bolýy mańyzdy. QHR aýyl sharýashylyǵyn tsıfrlandyrý, zamanaýı tehnologııalardy engizý, veterınarııalyq baqylaý jáne qaıta óńdeý salalaryn damytý baǵyttarynda aıtarlyqtaı tájirıbe jınaqtady. Mamandarymyzdyń mindeti — osy sheshimderdi zerdelep, salamyz ben óńirlerimizdiń erekshelikterin eskere otyryp, olardyń qaısysyn Qazaqstanda tıimdi qoldanýǵa bolatynyn anyqtaý, — dedi QR Aýyl sharýashylyǵy mınıstrligi apparatynyń basshysy Sergeı Lı.
Baǵdarlama aıasynda eki el mamandary arasynda tájirıbe almasýǵa erekshe mán beriledi. Qatysýshylar agrarlyq óndiristi uıymdastyrýdyń zamanaýı tásilderimen, memlekettik retteý jáne baqylaý tetikterimen tanysyp, sondaı-aq qytaılyq áriptesterimen AÓK-ti damytýdyń ózekti máselelerin talqylaı alady.
Oqytýǵa baılanysty barlyq shyǵyn QHR Kommertsııa mınıstrligi tarapynan óteledi.
Osydan buryn 2027 jylǵa deıin 2 399 veterınarııalyq nysan salynyp, jańartylatyny aıtyldy.
