Qazaqstandyq aǵylshyn tili muǵalimderi bilimin Londonda shyńdady
LONDON. KAZINFORM — Jıyrmadan astam aǵylshyn tiliniń muǵalimi men sala basshylary brıtanııalyq áriptesterimen kezdesip, úzdiksiz kásibı damý júıesiniń ozyq úlgilerimen tanysty, dep habarlaıdy Kazinform tilshisi.
Qazaqstanda aǵylshyn tili pánin tıimdi oqytý máseleleri ózekti bolyp tur. Bul týraly 2 jyl buryn Qazaq-Brıtan úkimetaralyq komıssııa otyrysynda aıtyldy. Arnaıy qurylǵan jumys toby ǵylymı zertteýler júrgizip, usynystar bildirdi. Solardyń biri otandyq muǵalimderdiń úzdiksiz kásibı damýy úshin ozyq brıtanııalyq ádistememen tereńirek tanysý.
«Áriptesterimizdiń tájirıbeleri, árıne, álemge tanylyp jatyr. Jańa aqparatty osy kisilerden alyp, ózimizdegi problemalardy sheshý jolyn qarastyrý úshin kelip otyrmyz», - deıdi QR Oqý-aǵartý mınıstrligi orta bilim komıtetiniń basqarma basshysy Álııa Chokýsheva.
22 adamnan turatyn delegatsııa quramynda joǵary oqý oryndarynyń basshylarynan bastap, aýyl muǵalimderine deıin bar. Shaqyrýshy tarap - Ulybrıtanııa halyqaralyq saýda departamenti jáne Brıtan keńesi. Olar úzdiksiz kásibı damý júıesi boıynsha paneldik pikirtalastar ótkizip, mektepter men ýnıversıetterge saparlar uıymdastyrdy.
«Ulybrıtanııa muǵalimder daıyndaýda óte qatań álemdik standarttardy ustanady. Biz úzdiksiz kásibı damý máselesine erekshe mán beremiz. Osy bilimimizben qazaqstandyq áriptesterimizben bólisýge daıynbyz», - dedi Kıngs kolledj London ýnıversıteti bilim, kommýnıkatsııa jáne qoǵam mektebiniń basshysy Lıvııa Mateı.
Sapar barysynda muǵalimderdi sertıfıkattaý, olar úshin biliktilikti arttyrý kýrstaryn uıymdastyrý jáne mektep basshylary men ádiskerlerdi qoldaý máseleleri de basty nazarda boldy. Úzdiksiz kásibı damýdyń prıntsıpteri men tájirıbelerin úırený úshin otandyq pedagogtar brıtanııalyq áriptesterimen tyǵyz baılanys ornatty.
