Qazaqstandyq 9 jasar fýtbolshy Túrkııanyń «Beshıktash» klýbynda jattyǵatyn bolady
Qazaqstandyq 9 jasar Aldııar Muqanov Túrkııanyń «Beshıktash» klýbynda jattyǵatyn bolady, dep habarlaıdy QazAqparat tilshisi.
Bir jyldan beri «Aqjaıyq-2014» komandasynda jattyǵatyn Aldııar maýsym aıynda Almaty qalasyna baryp, irikteýdiń birinshi kezeńinen ótken.
Aldııardyń anasy Baıansulý Muqanovanyń aıtýynsha, elishilik irikteýden ótken 6 bala Ystanbul qalasyna barǵan. Onda irikteýden ekeýi ótken.
Endi jas fýtbolshy 11 qazanda Ystanbulǵa jol júredi. Onyń alǵashqy bapkeri Arystan Kýltaev shákirtinen úlken úmit kútedi.
Qazirgi kezde Aldııar túrik tilin úırenip júr. Onyń Túrkııadaǵy barlyq shyǵynyn «Beshıktash» klýby óz moınyna aldy.
Osylaısha, Qazaqstan ulttyq quramasynyń oıynshysy Bahtıer Zaınýtdınovtyń komandalasy atanǵan Aldııardy «Aqjaıyq» FK dırektory Manarbek Erjanov quttyqtap, estelik syılyq tabys etti.
Aldııar Ystanbulda bastapqy kezeńde naǵashy ájesimen birge turmaq.
