Qazaqstandyq 30 taýar óndirýshi SІІE kórmesine qatysady
Qazaqstandyq 30 taýar óndirýshi Shanhaıda 5-10 qarasha aralyǵynda ótetin, áli jumysyn bastamaǵan altynshy Qytaı halyqaralyq ımport kórmesine qatysady, dep habarlaıdy Kazinform agenttiginiń menshikti tilshisi.
“Qaztrade” AQ eksportty damytý departamentiniń dırektory Mıra Jańabergenovanyń sózinshe, Qytaıdaǵy kórmede Qazaqstan eki stendke qoıylǵan - ulttyq jáne kommertsııalyq.
"Ulttyq pavılonymyzdyń negizgi kontseptsııasy - “AÓK-nen ınnovatsııaǵa deıin”. Biz Qazaqstannyń negizgi baǵyttaryn tanystyramyz, onyń ishinde agroónerkásiptik keshen, ınvestıtsııa, týrızm, eksport, logıstıka men basqa da baǵyttar bar", - dedi «Qaztrade” ókili.
Ol ary qaraı kommertsııalyq pavılon stendi “Taǵam jáne aýylsharýashylyǵy ónerkásibi” sektorynda ekenin aıtty. Ol jerge qazaqstandyq 30 taýar óndirýshi óz ónimderin qoıǵan. Olardyń qatarynda makaron jáne kondıterlik ónimder, ósimdik maıy, bal, sút ónimderi, onyń ishinde shubat pen qymyz jáne t.b. bar.
"Qazaqstandyq ónim Qytaıdaǵy kórmede syrtqy naryqqa otandyq óndirýshilerdiń shıkizattyq emes ónimderin shyǵarý memlekettik baǵdarlamasyn júzege asyrý aıasynda tanystyrylady", - dep atap ótti ol.
“Qaztrade” AQ ókili Qazaqstan Qytaı halyqaralyq ımport kórmesine ol jumysyn bastaǵan 2018 jyldan beri qatysyp kele jatqanyn atap ótti. Bes jyl ishinde kórmede 100-den astam qazaqstandyq kompanııa 260 mln dollardan asatyn eksporttyq kelisimsharttar ornatqanyn atap ótti.
Buǵan deıin Beıjińdegi baspasóz konferentsııasynda QHR kommertsııa mınıstriniń orynbasary Shen Tsıýpın habarlaǵandaı, bıyl altynshy Qytaı halyqaralyq ımport kórmesinde 70-ke jýyq el ulttyq ónimderin tanystyrady. Onyń 11-i alǵash ret kórmege oflaın-formatta qatysady.
Qazirgi SІІE qurmetti qonaqtary Qazaqstan, Vetnam, Serbııa men basqa da elder bolmaq.
Altynshy Qytaı halyqaralyq ımport kórmesi 5-10 qarasha aralyǵynda Shanhaıda ótedi.
EKSPO-ǵa 154 el men álem óńirleri, sondaı-aq halyqaralyq uıym ókilderi qatysady.
Qazirgi kúni 3,4 myńnan astam kompanııa qatysý úshin tirkeldi. Oǵan 410 myńǵa jýyq kásibı satyp alýshy barady dep josparlanǵan.
