Qazaqstandyq 25-ten astam óndirýshiniń ónimi Túrikmenstandaǵy kórmege qoıyldy
ASTANA. KAZINFORM — Qazaqstannyń 25-ten astam aýyl sharýashylyǵy ónimin óndirýshisi men tamaq ónerkásibi kásiporny Túrikmenstanda ótken ulttyq taǵamdar festıvalinde otandyq ónimderin tanystyrdy.
Qazaqstannyń ulttyq pavılonynda uıymdastyrylǵan kórme Ortalyq Azııa memleketteri basshylary men Ázerbaıjan Prezıdentiniń 8-konsýltatıvtik kezdesýiniń aıasynda ótti.
Prezıdent Qasym-Jomart Toqaev pen kezdesýge qatysýshy memleketterdiń basshylary óńir elderiniń ulttyq taǵamdary men mádenı murasyn tanystyratyn pavılondardy aralap, usynylǵan ekspozıtsııalarmen tanysty.
Qazaqstannyń ulttyq pavılonynda otandyq ónimderdiń keń tańdaýy usynyldy. Ekspozıtsııa elimizdiń ulttyq taǵamdarynyń baılyǵyn, azyq-túlik óndirisiniń múmkindikterin jáne agroónerkásiptik kesheniniń áleýetin kórsetti.
Kórmege qazaqstandyq aport almasy, kondıterlik ónimder, qurt, bal, sýblımatsııalanǵan jemister, balmuzdaq, shokolad, eshki men túıe súti, saýmal, ósimdik maılary, shyryndar, konserviler, shujyq jáne makaron ónimderi, jarmalar, shubat, balyq ónimderi men basqa da otandyq taýarlar qoıyldy.
Qazaqstan atynan kórmege «Evrazııa Invest LTD», «Baıan Sulý», «Nátıje sút fabrıkasy», «Bıjan» seriktestikteri, Apple Bee, «Rahat» aktsıonerlik qoǵamy, «Issyqskıı Aport» sharýa qojalyǵy jáne basqa da otandyq kásiporyndar qatysty.
Halyqaralyq is-shara qazaqstandyq óndirýshilerge óz ónimderin sheteldik aýdıtorııaǵa tanystyrýǵa, ulttyq gastronomııalyq dástúrlerdiń ózindik ereksheligin kórsetýge jáne aýyl sharýashylyǵy shıkizatyn óndirý men óńdeý salasyndaǵy otandyq kásiporyndardyń múmkindikterin pash etýge jol ashty.
Mundaı halyqaralyq alańdar óńir elderi arasyndaǵy mádenı jáne ekonomıkalyq yntymaqtastyqty nyǵaıtýǵa, sondaı-aq qazaqstandyq azyq-túlik ónimderiniń sheteldik naryqtardaǵy tanymaldyǵyn arttyrýǵa yqpal etedi.
TMD memleketteri basshylary ulttyq taǵamdar festıvalin tamashalaǵanyn jazǵan edik.
