Qazaqstandy velosıpedpen aralap júrgen saıahatshy Almatyǵa jetti
ALMATY. KAZINFORM — Qazaqstandy velosıpedpen aralap júrgen saıahatshy Búrlen Ádilet Almatyǵa keldi.
Onyń sapary 20 sáýirde Aqtaýdan bastalǵan. Osy ýaqyt ishinde ol elimizdiń batys jáne ońtústik óńirin aralap, shamamen 3 800 shaqyrym jol júrip ótip, Almatyǵa taban tiredi.
Aıta keteıik, bul onyń alyp shaharǵa alǵash kelýi emes. Buǵan deıin de Almatyda bolǵan saıahatshy qala turǵyndarynyń qonaqjaılyǵy men tabıǵatynyń erekshe sulýlyǵyn joǵary baǵalaıtynyn aıtty. Alda ony Astanaǵa jalǵasatyn jańa baǵyt kútip tur.
— Maqsatym — Qazaqstannyń sulýlyǵyn barynsha kóp adamǵa kórsetý. Ár saparymdy kameraǵa túsirip, áleýmettik jelide jarııalaımyn. Shetelde týyp-ósken qazaqtar ózderiniń qandaı ásem Otany bar ekenin kórse deımin. Qazaqstandy tolyq aralap, onyń tarıhy men mádenıetin tereńirek tanyǵym keledi, — dedi Búrlen Ádilet.
Saıahattaǵy onyń serigi — Oral esimdi marǵaý. Búrlen Ádilettiń aıtýynsha, bul ataýdyń ózindik sımvoldyq máni bar. Ol týǵan qalasy Oraldy, tarıhı Otanyna oralý ıdeıasyn jáne búkil saıahattyń rýhanı mazmunyn bildiredi.
Saıahatshy bul joldy jańa tájirıbe jınap, eldiń tarıhy men mádenıetin tereńirek tanyp-bilýge múmkindik beretin erekshe sapar dep sanaıdy.
Eske salaıyq, buǵan deıin 76 jastaǵy qazaqstandyq saıahatshy Sársenbaı Qotyrashev 3 myń shaqyrym jol júrip, Parıjge jetkenin jazǵanbyz.
