Qazaqstandy óńirlik tsıfrlyq habqa aınaldyrý úshin qandaı jobalar iske asyrylady
ASTANA. KAZINFORM – Búgin Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Madıev Qazaqstandy óńirlik tsıfrlyq habqa aınaldyrý úshin qandaı jobalar iske asyrylatynyn aıtty.
«Tsıfrlyq Jibek jolyn damytý jáne Qazaqstandy óńirlik tsıfrlyq habqa aınaldyrý úshin Ulttyq joba aıasynda 3 is-sharany iske asyrý kózdelgen. Birinshisi – uzyndyǵy 370 shaqyrym bolatyn Kaspıı teńiziniń túbine optıka tóseý. Eki eldiń baılanys operatorlarynyń ınvestıtsııalary 23 mlrd teńgeden asady. Búgingi kúni «Qazaqtelekom» men «Ázertelekom» arasynda birlesken kásiporyn qurylǵan jáne sý astyndaǵy talshyqty optıkalyq baılanys jelisin jobalaý jáne tóseý úshin merdigerdi tańdaý boıynsha tender aıaqtalaýda», - dedi mınıstr.
Onyń aıtýynsha, ekinshisi – Qazaqstan aýmaǵy boıynsha tranzıttik trafıkti ulǵaıtýdy kózdeıtin Batys-Shyǵys Ulttyq gıpermagıstraliniń qurylysy. Úshinshisi – tranzıt pen halyqaralyq trafıkti saqtaý úshin Tier-III deńgeıinen tómen emes derekter ortalyǵyn salý. Osy eki joba boıynsha «Freedom telecom» kompanııasynan usynys túsken.
«Gıpermagıstralǵa jeke ınvestıtsııalar 17 mlrd teńgeden asady. Іske asyrý merzimi 2025 jyldyń sońyna deıin. Al 2027 jyldyń sońyna deıin iske asyrylatyn derekter ortalyǵynyń qurylysyna 90 mlrd teńgeden astam qarajat kerek. Osylaısha, joǵaryda atalǵan jobalardy iske asyrý derekterdiń halyqaralyq tranzıtiniń balamaly baǵytyn jáne el naryǵyna BigTech kompanııalaryn (Google, Amazon, Microsoft) tartýdy qamtamasyz etedi. Aıta ketý kerek, osy 3 jobany operatorlar óz qarajaty esebinen qarjylandyrady», - dedi Jaslan Mádıev.
