Qazaqstandy mekendeıtin dala ańdary týraly jańa kitap shyqty
ASTANA. KAZINFORM — Búgin elordada Qazaqstannyń bıoalýantúrliligin saqtaý qaýymdastyǵy qurastyrǵan «Qazaqstandaǵy dala ańdary» kitabynyń resmı tanystyrylymy ótti. Kitapta dala ekojúıesinde mekendeıtin sútqorektiler týraly baıandalady.
Qaýymdastyq málimetinshe, Qazaqstan aýmaǵynyń úshten birin alyp jatqan dalaly óńirler bıologııalyq turǵydan baı ekojúıeler qataryna jatady. Basylym oqyrmandy osy óńirlerde mekendeıtin ańdardyń túrlik quramy, tirshilik etý ortasyna beıimdelýi men tabıǵı tepe-teńdiktegi rólimen tanystyrady. Bul - kitaptyń ekinshi, tolyqtyrylǵan jáne orys tilindegi nusqasy. Buǵan deıin, 2023 jyly qazaq tilinde shyqqan. Avtorlary – zoolog-ǵalymdar Alena Koshkına, Sergeı Sklıarenko jáne Ilıa Smelıanskıı.
- Dalaly jerler – Qazaqstannyń jan júregi. Bizdiń mindetimiz - ondaǵy bıoalýantúrlilikti saqtaý. Bul qural biregeı álemdi jete tanýǵa jáne ony qorǵaýǵa talpynatyn ár adam izdep oqıtyn kitapqa aınalady dep úmittenemiz, - deıdi Alena Koshkına.
Jańa basylymnyń ereksheligi – janýarlar týraly ǵylymı derektermen qatar, Darıa Sklıarenkonyń qolynan shyqqan kórkem ıllıýstratsııalarmen bezendirilgen.
- Árıne, kórneki sheshimniń mańyzy zor. Kitaptyń basym bóligi sýretterden turady. Sýretshi retinde maǵan tús pen kompozıtsııanyń úılesimin tabý, dala janýarlary men landshaftarynyń tabıǵı túsin dál berý mańyzdy boldy. Sondyqtan foto jáne vıdeo materıaldarǵa súıendim, sarapshylarmen únemi baılanysta boldym, - deıdi ıllıýstrator.
Basylym mektep oqýshylary, muǵalimder, stýdentter men tabıǵat janashyrlaryna arnalǵan. Qazaq tilindegi alǵashqy nusqasy aýyl mektepteri men óńirlik kitaphanalarda keńinen qoldanylyp, oń baǵasyn alypty.
Shyǵarýshy redaktor Elmıra Mýstafınanyń aıtýynsha, bolashaqta kitaptyń aǵylshyn tilindegi nusqasy ázirlenbek. Sondaı-aq qazaq tilindegi alǵashqy basylymǵa mazmundyq jáne kórkemdik ózgerister engizý josparlanǵan.
Kitaptyń negizgi bóligi bilim berý uıymdary men kitaphanalarǵa tegin taratylady. Basylymdy myna elektrondyq poshtasyna hat joldaý arqyly alýǵa bolady.
Aıta ketsek, Kólsaı kólderi ulttyq parkinde Qyzyl kitapqa engen ilbis fototuzaqqa túsip qaldy.
Birǵanym Álıqyzy