Qazaqstandy qansha bosqyn panalap júr
ASTANA. KAZINFORM – Eńbek jáne halyqtyń áleýmettik qorǵaý mınıstrligindegiler Kazinform saýalyna joldaǵan jaýabynda Qazaqstannan qansha bosqyn pana tapqanyn aıtty.
«2024 jylǵy 1 naýryzǵa elimizde 322 shetel azamattarynda bosqyn mártebesi bar. Bosqyndardyń basym bóligi Almaty (219 adam), Shymkent (21 adam) qalalarynda, Atyraý (15 adam), Almaty (13 adam), Soltústik Qazaqstan (12 adam), Shyǵys Qazaqstan (9 adam) jáne t. b. oblystarda turady», - delingen jaýapta.
Vedomstvonyń deregine súıensek, ulttyq zańnama bosqyn mártebesi bar adamdarǵa Qazaqstan bıýdjetinen áleýmettik kómek aýlǵa múmkindik beredi. Biraq ol múmkindikti bosqyndardyń eshbiri paıdalanyp otyrǵan joq.
«QR Áleýmettik Kodeksiniń 120-babyna sáıkes, ataýly áleýmettik kómek jan basyna shaqqandaǵy ortasha kirisi kedeılik sheginen aspaıtyn Qazaqstan Respýblıkasynyń azamattaryna, Qazaqstan Respýblıkasynda turaqty turatyn qandastarǵa, bosqyndarǵa, sheteldikterge jáne azamattyǵy joq adamdarǵa beriledi. Adamdardyń (otbasylardyń) shartsyz aqshalaı kómek nemese shartty aqshalaı kómek túrindegi ataýly áleýmettik kómek alýǵa quqyǵy bar. Alaıda qazirgi tańda elimizde ataýly áleýmettik kómek alatyn bosqyn mártebesine ıe shetel azamattary joq ekendigin habarlaımyz», - dep jazylǵan mınıstrlik jaýabynda.
