Djordja Melonı: Qazaqstan — Ortalyq Azııadaǵy mańyzdy áriptes

ASTANA. KAZINFORM — Memleket basshysy men Italııa Premer-mınıstri elorda áýejaıynda az-kem áńgimelesti, dep habarlaıdy Aqordanyń baspasóz qyzmeti.

Qasym-Jomart Toqaev Italııa — Qazaqstannyń Eýropadaǵy jetekshi saýda seriktesteriniń biri ekenin aıtty.

— Sizdi Qazaqstanda qarsy alý — biz úshin úlken mártebe. Aldaǵy kelissózder ekijaqty qarym-qatynastarymyzǵa tyń serpin berýde mańyzdy, tipti, sheshýshi ról atqaratynyna senimdimin. Italııa — Qazaqstannyń Eýropadaǵy jetekshi saýda seriktesteriniń biri. Kesheli-búgin Astanada Italııa bıznesiniń kóptegen ókiliniń qatysýymen bıznes-forým ótti. Eki el arasyndaǵy iskerlik baılanystardy damytýǵa qosqan úlesińizdi joǵary baǵalaımyz, — dedi Toqaev.

Óz kezeginde Djordja Melonı bul basqosý aımaqpen qarym-qatynastaǵy tarıhı sát bolatynyn atap ótti.

— Sizdiń elińizge alǵash ret kelip otyrmyn. Óte qýanyshtymyn. Ózińiz aıtqandaı, eki eldiń qarym-qatynasy óte jaqsy. Alaıda budan da joǵary nátıjege qol jetkizýge árdaıym múmkindik bar. Biz Qazaqstandy Italııanyń, sondaı-aq Eýropanyń mańyzdy seriktesi retinde qarastyramyz. Sonymen qatar qazirgi kezde Ortalyq Azııa óńiri strategııalyq mánge ıe boldy. Memleketter basshylary deńgeıinde birinshi «Italııa — Ortalyq Azııa» sammıtin uıymdastyrǵanyńyz úshin Sizge rızashylyǵymdy bildiremin. Bul basqosý aımaqpen qarym-qatynasymyzdaǵy tarıhı sát bolady dep oılaımyn. Qazirgi syndarly kezeńde biz úshin barlyq deńgeıde yntymaqtastyq ornatý óte ózekti, — dedi Italııa Premer-mınıstri.

Buǵan deıin Memleket basshysy Qazaqstanǵa resmı saparmen kelgen Italııa Premer-mınıstri Djordja Melonıdi elorda áýejaıynan qarsy alǵanyn jazdyq.