Qazaqstandy gazdandyrý deńgeıi 64%-dan asty
ASTANA. KAZINFORM - Qazaqstanda tabıǵı gazǵa qol jetkizgen turǵyndar sany artyp keledi. 2026 jylǵy 1 qańtardaǵy jaǵdaı boıynsha eldegi gazdandyrý deńgeıi 64,2%-dy qurady. Bul týraly Ortalyq kommýnıkatsııalar qyzmetinde ótken baspasóz konferentsııasynda QR Energetıka vıtse-mınıstri Qaıyrhan Tutqyshbaev málimdedi.
Onyń aıtýynsha, qazirgi tańda 20,5 mln qazaqstandyqtyń 13,1 mıllıony tabıǵı gazben qamtylǵan.
– 2025 jyldyń qorytyndysy boıynsha, 354 myńnan astam adam turatyn 94 eldi meken tabıǵı gazǵa qosylǵan. Osy kezeńde 2 myń shaqyrymnan astam gaz qubyry salynyp, 82 gazben jabdyqtaý jobasynyń qurylysy aıaqtalǵan. Al 2026 jylǵy 1 qańtarda gazdandyrý deńgeıi 64,2%-ǵa jetken nemese 20,5 mln adamnyń 13,1 mıllıony tabıǵı gazǵa qol jetkizdi, - dedi spıker.
Sondaı-aq vıtse-mınıstr gazdandyrý deńgeıi eń joǵary óńirlerge toqtalyp ótti.
– Gazdandyrý deńgeıi respýblıkanyń batys oblystarynda, Jambyl oblysynda, sondaı-aq Almaty jáne Shymkent qalalarynda 90%-dan asady. Al Almaty, Qyzylorda, Túrkistan, Qostanaı jáne Jetisý oblystarynda bul kórsetkish 60%-dan 90%-ǵa deıingi aralyqty quraıdy, - dedi Qaıyrhan Tutqyshbaev.
Sonymen birge Qaraǵandy, Aqmola jáne Ulytaý oblystarynda bul kórsetkish 60%-dan tómen deńgeıde ekenin jetkizdi.
Energetıka mınıstrliginiń málimetinshe, 2026 jyly respýblıkalyq bıýdjetten gaz tasymaldaý júıesin damytýǵa bólingen 27,3 mlrd teńge esebinen gazdandyrý deńgeıin 64,3%-ǵa jetkizý josparlanyp otyr. Osy arqyly taǵy 32 myńǵa jýyq adam tabıǵı gazǵa qol jetkizedi.
Aıta keteıik, Astanany gazdandyrý bıyl tolyq aıaqtalady.
