Qazaqstanǵa 4 mlrd teńge shyǵyn keltirgen qylmystyq top basshysy ekstradıtsııalandy

ASTANA. KAZINFORM – Bas prokýratýra jáne Qarjylyq monıtorıng agenttiginiń qyzmetkerleri Qazaqstannyń Syrtqy ister mınıstrliginiń kómegimen uıymdasqan qylmystyq topty qurǵany jáne onyń qyzmetine basshylyq etkeni úshin qylmystyq jaýapqa tartý úshin Ázerbaıjannan Qazaqstan azamaty ekstradıtsııalandy.

QR Bas prokýratýrasy baspasóz qyzmetiniń habarlaýynsha, 2016-2018 jyldary aralyǵynda kúdikti Qazaqstanǵa halyq tutynatyn taýarlardy kontrabandalyq jolmen ákelýmen aınalysqan, sondaı-aq kedendik tólemder men salyqtardy tóleýden jaltarǵan qylmystyq topty tikeleı basqardy. Osy qyzmettiń nátıjesinde memleketke 4 mıllıard teńgeden astam shyǵyn keltirilgen.

Qylmys jasaǵannan keıin ol tergeýden jasyrynyp, halyqaralyq izdeýge jarııalandy.

Keıin kúdikti Ázerbaıjan aýmaǵynda ustaldy.

Ázerbaıjan Respýblıkasynyń Bas prokýratýrasymen Qazaqstan Respýblıkasy Bas prokýratýrasynyń ony ustap berý týraly suraý salýy qanaǵattandyryldy.

Qazirgi ýaqytta ol Aqtaý qalasynyń tergeý ızolıatoryna qamaldy.

Atalǵan qylmysty jasaǵany úshin múlki tárkilenip, jeti jyldan on eki jylǵa deıingi merzimge bas bostandyǵynan aıyrý jazasy qarastyrylǵan.

Aıta keteıik, 2019 jyldyń jeltoqsanynda Mańǵystaý oblysynyń soty osy uıymdasqan qylmystyq toptyń qyzmetine qatysy bar 12 adamdy túrli jazaǵa sottady.