Qazaqstandaǵy JOO-lar jekelegen mamandyqtardy oqytý quqyǵynan aıyrylýda
ASTANA. QazAqparat - Qazaqstandaǵy Joǵarǵy oqý oryndary jekelegen mamandyqtardy oqytý quqyǵynan, ıaǵnı lıtsenzııadaǵy qosymshalardan aıyrylyp jatyr. Bul týraly QR Úkimetiniń baspasóz ortalyǵynda brıfıng ótkizgen QR Bilim jáne ǵylym vıtse-mınıstri Ashat Aımaǵambetov málim etti, dep habarlaıdy QazAqparat tilshisi.
«Bıyl «Bilim týraly» zańnyń «JOO-lardyń akademııalyq derbestigi» bóligine ózgerister engizilgen bolatyn. Shynynda da, JOO-lardyń jaýapkershiligi artyp keledi. Sondyqtan, JOO-lardyń birqatary birigip, «Akademııalyq adaldyq lıgasyn» qurǵaly jatqanyn jarııalady. Biz bul qadamdy qoldaımyz. Sonymen birge, mınıstrlik tarapynan JOO-lardyń bilim baǵdarlamasyna talaptar kúsheıtilip keledi. JOO-ǵa jumysqa turý turǵysynda da talaptar kúsheıtiletin bolady», - deıdi vıtse-mınıstr.
Demek, ýnıversıtet belgili bir mamandyq boıynsha mamandardy daıyndap, bul JOO túlekteri oqý bitirgennen keıin jumys taba almasa - onda BǴM ol oqý oryndarynyń aldyna «Qajetti mamandardy daıyndap jatyrsyzdar ma? Ol mamandyqtyń qajeti bar ma?» degen suraqtardy kese-kóldeneń tartady.
«Sondyqtan, qazirgi tańda lıtsenzııadaǵy 17 mamandyq boıynsha qosymsha qaıtarylyp alyndy. Bul rette lıtsenzııa shaqyryp alyndy degen kezde mynany túsinýimiz kerek: jalpy JOO-dan emes, jekelegen mamandyqtar boıynsha lıtsenzııalar qaıtarylyp alynady. Máselen, belgili bir ýnıversıtetten «fılosofııa» páni boıynsha lıtsenzııa qaıtarylady. Sebebi, ol pánderdi oqytý talaptarǵa sáıkes kele bermeıdi», - deıdi Ashat Aımaǵambetov.
