Qazaqstandaǵy joldardyń qaýipsizdigi «juldyzdarmen» ólshenedi

NUR-SULTAN. QazAqparat - Qazaqstanda qaýipsiz joldar reıtıngi túziledi, al joldardyń qaýipsizdik deńgeıi «juldyzdarmen» ólshenetin bolady. Bul týraly «Jol aktıvteriniń sapasy ulttyq ortalyǵy» RMK bas dırektory Zamır Saǵynov QR Sybaılas jemqorlyqqa qarsy is-qımyl agenttiginde ótken brıfıngte aıtty, dep habarlaıdy QazAqparat tilshisi.

Zamır Saǵynovtyń aıtýynsha, atalmysh júıeni qurý jumystary bıyl aıaqtalady.

«Bul júıe bizge ne beredi? 3-4 jyl ishinde biz barlyq jol jelisine dıagnostıka júrgizemiz. ıAǵnı, barlyq aqparatty, qashan jáne qandaı jóndeý júrgizilgenin saralaımyz. Sol boıynsha qaı joldy qashan jóndeý kerektigi týraly usynystar berip otyramyz. Dúnıejúzilik banktiń baǵalaýynsha, ýaqytynda júrgizilmegen jóndeý jalpy shyǵyndardy 2-3 esege ulǵaıtady. Bul júıege árbir azamat qatysa alady. Ózi turatyn aýmaqtaǵy joldyń sapasy týraly aqparat usynýyna bolady», - dedi ol.

Sondaı-aq, ol bolashaqta eldegi joldardyń qaýipsizdik deńgeıi boıynsha birneshe sanatqa bólinetinin jetkizdi.

«Jaqynda biz qaýipsizdik deńgeıi boıynsha joldardy saralaý júıesin engizýdi josparlap otyrmyz . Baǵalaý bir juldyzdan bes juldyzǵa deıin. Bir juldyz - qaýipti jol, 5 juldyz - qaýipsiz jol degendi bildiredi», - dep atap ótti kásiporyn dırektory.

Zamır Saǵynov jol salý jáne jóndeý kólemi artqan saıyn sybaılas jemqorlyq táýekelderi de artatynyn aıtady.

«Sondyqtan, ortalyq bazasynda sybaılas jemqorlyqqa qarsy is-qımyl agenttiginiń qoldaýymen jobalyq keńse qurylady. Onda barlyq satylarda sybaılas jemqorlyq táýekelderi taldanady, barlyq bıznes-protsesterdi tsıfrlandyrý boıynsha sheshimder qabyldanady. Osynyń bári ár azamat úshin ashyq qoljetimdi bolady», - dedi ortalyq ókili.