Qazaqstandaǵy joǵary oqý oryndary arasynda alǵash ret Almatyda Qamqorshylar keńesi quryldy
ALMATY. Qyrkúıektiń 17-si. QazAqparat /Erlik Erjanuly/ - Búgin Almatydaǵy Qazaqtyń ál-Farabı atyndaǵy ulttyq ýnıversıtetinde Qamqorshylar keńesiniń birinshi otyrysy ótti,
dep habarlaıdy QazAqparat.
Qorǵanys mınıstri Ádilbek Jaqsybekov tóraǵalyq etken otyrysqa kórnekti memleket jáne qoǵam qaıratkerleri men iri kommertsııalyq kompanııalardyń jetekshileri qatysty. Qamqorshylar keńesine QR Prezıdenti Ákimshiligi basshysynyń orynbasary Máýlen Áshimbaev, QR Parlamenti Senatynyń depýtaty Qýanysh Sultanov, Mádenıet mınıstri Muhtar Qul-Muhammed,Ulttyq Ǵarysh agenttiginiń tóraǵasy Talǵat Musabaev, "Capital Partners" kompanııasy dırektorlar keńesiniń tóraǵasy Serjan Jumashev, QazUÝ rektory Baqytjan Jumaǵulov jáne taǵy basqa da azamattar enip otyr.
"Qazaqstandyq joǵary oqý oryndary arasynda Qamqorshylar keńesi ınstıtýtyn QazUÝ birinshi bolyp uıymdastyryp otyr. Qamqorshylar keńesi - joǵary oqý oryndarynyń is-áreketin qadaǵalaıtyn qoǵamdyq baqylaý bolyp tabylady. Mundaı keńes álemdik ýnıversıtetter tájirıbesinde burynnan bar. Al elimizdegi bilim ordalary arasynda alǵash ret Qazaqstannyń birinshi ýnıversıteti QazUÝ-ǵa engizip otyrmyz. Qamqorshylar keńesinde ýnıversıtettiń keleshekte damýy men ǵylym jáne bilim salasyndaǵy kóp suraqtar qaralady", deıdi rektor Baqytjan Jumaǵulov.
«Qamqorshylar keńesi álemdik ýnıversıtetterde 50 jyldan astam ýaqytan beri jumys jasap keledi. Sol sebepti ıgilikti bul istiń otandyq oqý ordasynda kórinis tabýy meni qýantyp otyr. Sebebi, biz Keńes jumysyn jaqsarta otyryp, álemdik deńgeıdegi mindetterdi atqarýdy qolǵa alyp otyrmyz", deıdi ǵaryshker Talǵat Musabaev. QazUÝ-dy zamanaýı-ınnovatsııalyq zertteý ortalyǵyna aınaldyrýdy maqsat tutatyn Qamqorshylar keńesiniń mańyzy týraly Senattyń Halyqaralyq qatynastar, qorǵanys jáne qaýipsizdik jónindegi komıtetiniń basshysy Qýanysh Sultanov: "Memlekettiń básekege qabilettiligi ǵylym, bilimmen tyǵyz baılanysty. Sol sebepti álemdik tájirıbeni qoldana otyryp, Qamqorshylar keńesin júzege asyrýymyz ýnıversıtettiń damyǵan elder qatarynda básekege tótep berýin arttyra túsetini sózsiz", dedi.
