Qazaqstandaǵy joǵary bilimniń damýy týraly zertteý qorytyndysy jarııalandy
ALMATY. 12 shilde. QazAqparat /Erlik Erjanuly/ - Búgin Almatyda "Greens.kz/Jasyldar" qoǵamdyq qorynyń uıymdastyrýymen "Joǵary oqý oryndarynyń ashyqtyǵy men eseptiligi joǵary bilim sapasyn kóterýdiń shynaıy talaby" dep atalatyn dóńgelek ústel jıyny ótip jatyr.
Olar onda "Soros-Qazaqstan" qorynyń qoldaýmen 6 aımaqtyq jastar uıymdarymen birlesip júrgizgen zertteý jumysynyń qorytyndysyn jarııalady.
Greens.kz/Jasyldar" qoǵamdyq qorynyń dırektory Pavel Koktyshevtiń aıtýynsha, "Joǵary oqý oryndarynyń ashyqtyǵy men eseptiligi joǵary bilim sapasyn kóterýdiń shynaıy talaby" jobasy eń aldymen JOO-ny basqarý men joǵary bilim salasyn qarjylandyrý týraly aqparattyq kompanııa ótkizýmen qatar, birqatar monıtorıngtik jáne baǵalaý zertteýlerin oryndaýǵa shoǵyrlanady. Onda taldamalyq baǵytty kúsheıtý jáne joǵary bilimniń nátıjeliligin barynsha tereń zertteý maqsatynda stýdentter, oqytýshylar, JOO ákimshilikteri, jumys berýshiler qaýymdastyqtary jáne jumys jasap jatqan bitirýshiler saýalnamaǵa tartylady.
"Saýalnama júrgizý úshin bul joly irikteýge 3 jeke jáne 9 memlekettik joǵary oqý orny qamtyldy. Onda aýdıtorııanyń árbir kategorııasy úshin saýalnamanyń 5 túri quryldy. Ol joǵary oqý oryndaryn bólý men olardyń jeke máselelerin anyqtaýdy aldyna maqsat etip qoımady. Máselen stýdentterge júrgizilgen saýalnama 3 baǵyttaǵy suraqtardy qamtydy. 1-granttar men nesıelerdiń berilý ashyqtyǵyn zertteý. 2-oqý úrdisi men qarjylandyrýdy basqarýdyń ashyqtyǵy men tıimdiligi. 3-alynǵan bilim sapsyn stýdentterdiń baǵalaýy", - deıdi Pavel Koktyshev. Onyń sózine qaraǵanda, jastar uıymdarynyń kózqarasy boıynsha joǵary oqý oryndaryndaǵy basqarýda ashyqtyq joq. JOO ákimshilikteri óz jumystarynyń nátıjeleri týraly tolyq kólemde aıta bermeıdi. Olar týraly aqparat tek qana býkletterde kórsetiledi jáne qarjylyq jáne ákimshilik málimetterdi quramaıdy. JOO-lar bilimderi men daǵdylary eńbek naryǵyna sáıkes kelmeıtin kadrlar daıyndaıdy. Bıznes qaýymdastyǵy negizinen joǵary bilim sapasymen qanaǵattanbaıdy.
