Qazaqstandaǵy jekemenshik JOO-larda bilim sapasyna qatysty máseleler áli de bar - A.Sárinjipov
ASTANA. QazAqparat - Qazaqstandaǵy jekemenshik joǵary oqý oryndarynda bilim sapasyna qatysty máseleler áli de barshylyq. Bul týraly búgin Parlament Senatynyń jalpy otyrysynda Bilim jáne ǵylym mınıstri Aslan Sárinjipov málim etti.
Eske salaıyq, jalpy otyrysta «Qazaqstan Respýblıkasynyń keıbir zańnamalyq aktilerine bilim berý máseleleri boıynsha ózgerister men tolyqtyrýlar engizý týraly» QR Zańy qabyldanǵan bolatyn. Mınıstrdiń sózine qaraǵanda, sońǵy ýaqytta elimizde bilim berý talaptaryna saı kelmeıtin jıyrma oqý ornynyń lıtsenzııasy toqtatylǵan. Sonyń ishinde byltyrǵy jyly bes joǵary oqý oryndary jabylǵan. «Qalǵan oqý oryndarymen bilim sapasyn arttyrý týraly jumys jasalyp jatyr, olar problemalardy sheshse, talaptardy oryndasa, lıtsenzııalary qaıtarylýy múmkin. Qazirgi kúni elimizde 125 joǵary oqý oryndary jumys isteıdi. Solardyń ishinde jıyrmaǵa jýyǵy - jeke menshik. Osy oqý oryndarynyń sapasyna qatysty áli de suraqtar týyndap otyr. Biz olarmen jumys istep jatyrmyz, eger máseleni sheshpese, ondaı ýnıversıtetter jabylatyn bolady», - dedi depýtattar suraǵyna jaýap bergen A.Sárinjipov. Onyń aıtýynsha, búgingi kúni joǵary oqý oryndaryn akkredıtteý júıesine kóshý máselesi de ózekti. Bul júıeniń 2017 jyly engizilýi kútiledi. «Osy aldaǵy eki jyl ishinde bizdiń ýnıversıtetterimiz ben akkredıtteý júrgizetin uıymdar daıyndyqtan ótetin bolady», - dedi mınıstr.
