Qazaqstandaǵy jekelegen azyq-túlik taýarlarynyń baǵasy álemniń iri qalalaryndaǵy kórsetkishten joǵary
Búgin Parlament Májilisinde elimizdegi azyq-túlik ónimderiniń baǵasyn retteý máselelerin talqylaý barysynda depýtat Ýálıhan Bıshimbaev osylaı málim etti.
«Qazaqstanda azyq-túlik ónimderi sebetindegi jekelegen taýarlardyń bólshek saýdadaǵy baǵasy álemniń iri qalalaryndaǵy baǵadan joǵary. Onyń ishinde Kedendik odaq elderi arasynda da osylaı bolyp otyr. Eger jaǵdaıdy ekonomıkalyq, baǵalyq qoljetimdilik turǵysynan qarastyrsaq, onda azyq-túliktiń azamattardyń jekelegen sanatyna qoljetimsiz bolyp bara jatqanyn aıtýǵa tıispiz. Olardyń ózderin, bala-shaǵasyn tamaqtandyrý úshin ǵana shyǵystardy molynan jumsaýyna týra keledi», - deıdi Ý. Bıshimbaev.
Depýtattyń aıtýynsha, memlekettik organdar da monıtorıng arqyly jaǵdaıdy baqylaýda ustap otyr. Máselen, Úkimet baǵa monıtorıngi jasalatyn áleýmettik mańyzdy azyq-túlik taýarlarynyń tizbesin kúnkóris sebetindegi 43 taýardyń 17 atalymy boıynsha qalyptastyrǵan. Sonymen qatar, Ý. Bıshimbaev azyq-túlik sebetindegi táýliktik tutyný normasy boıynsha 43 pozıtsııa qalyptasqanyn aıta kele, bunyń burynǵy KSRO normasynan da tómen ekendigin alǵa tartty. Onyń sózine qaraǵanda, qazirgi tańda Kedendik odaq memleketteriniń azyq-túlik sebetindegi aýqym men mólsher de ártúrli.
