Qazaqstandaǵy jaıylymdyq jerlerdiń 40 paıyzy óte nashar kúıde

ASTANA. QazAqparat – Elimizdegi aýyl sharýashylyǵy maqsatynda paıdalanylatyn jaıylymdyq jerlerdiń 40 paıyzy nashar kúıde. Mundaı derekter ǵaryshtyq monıtorıng nátıjesinde belgili boldy, dep habarlaıdy QazAqparat tilshisi.

«Byltyr kóktemde Qazaqstannyń 60 aýdany boıynsha jaıylymdyq alqaptardyń 26,2%-y óte nashar jáne 33,4%-y nashar jaǵdaıda ekeni anyqtaldy», - dedi Aeroǵarysh komıtetiniń tóraǵasy Baýbek Oralmaǵambetov Ortalyq kommýnıkatsııalar qyzmetinde ótken brıfıngide.

Al bıyl kóktem mezgilinde júrgizilgen monıtorıng qorytyndysy negizinde jaıylymdyq jerlerdiń jaı-kúıi mynadaı:

- 40% jaıylymdyq jerdiń jaǵdaıy óte nashar;

- 4 mln gektar jaıylym jer qatty dárejede degradatsııalanǵan;

- ósimdikterdiń ortasha ónimdiligi gektaryna 4,6 tsentner.

Sonymen qatar spıker byltyr Qazaqstan boıynsha 5 683 ruqsat etilmegen qoqys obektileri anyqtalǵanyn aıtty.

Buǵan qosa, Baýbek Oralmaǵambetov mal jaıýǵa berilgen 12 mln gektar jerde tórt túlik joq ekenin málim etti.