Qazaqstandaǵy jastardyń basty qundylyqtary qandaı - saýalnama
ASTANA. QazAparat - Qazaqstandaǵy jastardyń 80 paıyzdan kóbi otbasyly bolyp, bala tárbıeleýdi basty qundylyqtary dep esepteıdi, dep habarlaıdy «QazAqparat» HAA tilshisi.
«Elimizdiń mańyzdy adamı resýrsy - jastar bolyp tabylady. Eger jastar «Joldaýdan ne kútedi?» degen suraqqa keler bolsaq, jastar eń aldymen memlekettiń qamqorlyǵyn qalaıdy. Bizdiń zertteýimiz boıynsha, Qazaqstandaǵy jastardyń 70 paıyzy «memleket jastarǵa qamqor bolýy kerek» dep esepteıdi», - deıdi «Jastar» ǵylymı-zertteý ortalyǵy dırektorynyń ǵylym jónindegi orynbasary Ásem Qaıdarova Astanada Prezıdenttiń 10 qańtardaǵy Joldaýy talqylanǵan dóńgelek ústelde.
Onyń aıtýynsha, Elbasynyń Joldaýynda zamanaýı ındýstrıaldy qoǵamnyń trendtteri, ónerkásipti tsıfrlandyrý, adamı kapıtalǵa basymdyq berý, aǵylshyn tilin meńgerý sekildi ózekti máseleler esepke alynǵan. Ásem Qaıdarova osy mindetterdiń barlyǵy eń aldymen jastarǵa qatysty ekenin atap ótti.
«Qazaqstanda qazirgi ýaqytta bar halyqtyń 23 paıyzyn jastar quraıdy. Memleket basshysynyń Joldaýynda eń birinshi kezekte adam, adam kapıtaly men onyń qundylyqtary aldyńǵy qatarǵa shyqqan. Jastar úshin eń basty qundylyq - otbasy. Bizdiń zertteýimiz boıynsha Qazaqstandaǵy jastardyń 80 paıyzy ómirindegi basty qundylyqty - otbasy dep biledi. Alaıda saýalnama barysynda qundylyqtardyń qataryna tez baıý sekildi faktorlardy ataǵandar da bar», - deıdi ol.
Sonymen birge, sarapshy ókinishke qaraı úılengen jastardyń 35 paıyzy tolyq emes otbasyly, ıaǵnı ajyrasyp ketetinderdiń qatarynda ekenin aıtady.
«Qazaqstandy bolashaqta qandaı el retinde kóresiz?» degen saýalǵa jastardyń basym kópshiligi úsh tildi meńgergen kópetnosty memleket retinde kóretinderin aıtyp jaýap bergen. Naqty osy til meńgerý máselesine Elbasynyń Joldaýynda basa mańyz berilgenin aıta ketkim keledi», - dedi Ásem Qaıdarova.
Eske sala ketsek, Aqordanyń saıtynda 10 qańtarda Qazaqstan Respýblıkasynyń Prezıdenti Nursultan Nazarbaevtyń Qazaqstan halqyna joldaǵan «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy jarııalanǵan bolatyn. Memleket basshysy óz Joldaýynda el aldyndaǵy 10 negizgi mindetti ataǵan edi.
