Qazaqstandaǵy jańaratyn energııa resýrstarynyń áleýeti 1 trln. kVt/s-dan astam qýatqa baǵalanyp otyr
ASTANA. 3 qazan. QazAqparat - Qazaqstandaǵy jańaratyn energııa resýrstarynyń áleýeti 1 trln. kVt/s-dan astam qýatqa baǵalanyp otyr. Bul týraly KAZENERGY VII Eýrazııalyq forýmynda «Samuryq-Energo» AQ-nyń basqarma tóraǵasy Almasadam Satqalıev málim etti.
Onyń sózine qaraǵanda, qazirgi kezde «Samuryq-Energo» AQ jańaratyn energııa kózderin paıdalaný boıynsha jobalardy júzege asyrýda. Onyń ishinde Kerbulaq, Shardara, Bulaq gıdroelektr stansalaryn jáne Almaty jáne Aqmola oblystaryndaǵy jel elektr stansalaryn, sondaı-aq Almaty oblysyndaǵy Qapshaǵaı qalasy mańyndaǵy kún energııasynyń stansasyn salý iske asyrylmaq.
A. Satqalıevtyń aıtýynsha, aldaǵy ýaqytta Qazaqstannyń shaǵyn ózenderiniń áleýetin keshendi zertteý josparlanyp otyr. Osy oraıda energııa balansyna tartý úshin shaǵyn GES-tiń qurylystary boıynsha bolashaǵy bar jobalardyń tizimin anyqtaý kózdelgen.
