Qazaqstandaǵy zeınetaqy júıesindegi ózgerister týraly portaldardaǵy vırýstyq jarnama shyndyqqa saı kelmeıdi

ASTANA. QazAqparat - Google.com álemdik ǵalamtor izdeý júıesi arqyly keıbir aqparat portaldarynda qazaqstandyqtardyń zeınetkerlik jasyn ulǵaıtý men onyń kúshin joıý týraly vırýstyq jarnama túrindegi jarııalanyp turatyn bannerde shyndyqqa janaspaıtyn aqparat bar. Bul týraly QR Densaýlyq saqtaý jáne áleýmettik damý mınıstrliginen habarlandy.

«Málimet derekkózi Reseı Federatsııasynda tirkelgen www.zihipol.ru jarnama saıty bolyp tabylady. Bul saıt ınternet trafıgin ulǵaıtý maqsatyndaǵy avtomattandyrylǵan, baqylanbaıtyn ýaqytsha jarnama alańy. Onyń jasalǵan ýaqyty 2014 jyldyń 26 qazany, 2015 jyldyń 26 qazanynda saıt ózdiginen joıylady degen aqparat bar. Atalǵan saıtta jaryq kórgen aqparatta eshbir derekkózge silteme jasalmaǵanyn eskere otyryp, habarlamanyń shyndyqqa janaspaıtyndyǵy anyqtaldy. Bul turǵyda QR DSÁDM QR Ulttyq qaýipsizdik komıtetine qajetti sharalardy qoldaný boıynsha hat joldady», - dep atap ótilgen vedomstvo habarlamasynda.