Qazaqstandaǵy zaýyt kartop ónimderiniń 80 paıyzyn Reseıge eksporttaıdy
ASTANA. QazAqparat - «KazakhInvest» Ulttyq kompanııasy» AQ basqarma tóraǵasy mindetin atqarýshy Meıirjan Máıkenov taıaýda Qazaqstanda júzege asyrylatyn ınvestıtsııalyq jobalar jaıynda aıtyp berdi, dep habarlaıdy QazAqparat.
«Jalpy alǵanda, búginde «KazakhInvest» ulttyq kompanııasy jumysynda 158 joba qamtylǵan. Óńirlik turǵyda jobalardyń kóbisi Atyraý, Aqmola, Aqtóbe, Almaty oblystarynda jáne Astana qalasynda ornalasqan. Jobalardyń jalpy quny 49 mlrd dollarǵa baǵalanyp otyr. Atalǵan 158 jobanyń arasynda belsendi túrde pysyqtalyp jatqandarynyń sany 76-ǵa (20,4 mlrd dollar) jetti, ıaǵnı bul jobalarda áriptester, qarjylyq model, bıznes jospar, tehnıkalyq-ekonomıkalyq negizdeme eskerilgen. Osy oraıda bular tolyqtaı júzege asyrýǵa daıyn tur», - dep toqtaldy ol Senatta ótken el ekonomıkasyna ınvestıtsııa tartý taqyrybyndaǵy dóńgelek ústelde.
Onyń sózine qaraǵanda, bul 76 jobanyń ishinde transulttyq kompanııalardyń qatysýymen 34-i qamtylǵan. Atalǵan jobalardyń arasynda 26-sy qytaılyq, 20-sy eýropalyq elderdiń ınvestıtsııalaryna baǵdarlanǵan. Al salalyq nyshan boıynsha jobalardyń kóbisi hımııalyq, munaı-hımııalyq, farmatsevtıkalyq baǵyttarda iske asyrýǵa negizdelgen, ıaǵnı bul 19 joba 10 mlrd dollarǵa baǵalanyp otyr. Taý-ken ári metallýrgııalyq saladaǵy 18 joba 5 mlrd dollardy qurady. Sonymen qatar basymdyqqa ıe agroónerkásiptik keshendegi 12 jobanyń quny 500 mln dollarǵa jetti.
«2017 jyly júrgizilen jumystyń nátıjesinde 5 joba aıasynda qurylys jumystary bastaldy. Budan bólek, 2018 jylǵa josparda 16 jobany iske qosý kózdelgen. Olardyń arasynda Nıderlandynyń Farm Frites transulttyq korporatsııasy jobasyna toqtalsam, olar kartop ónimderin óndirýge mamandandyrylǵan. Bul kompanııa barsha álem boıynsha McDonalds júıesine resmı ónim jetkizýshi bolyp tabylady. Farm Frites ıeliginde kartop óndirýde iri alty zaýyty bar. Endi jetinshi zaýyt Almaty oblysynda salynady. Zaýyttyń qýattylyǵy 70 myń tonnany quraıdy. Atap aıtqanda, barsha ónimniń 80 paıyzy reseılik naryqqa eksporttalatyn bolady», - dedi Meıirjan Máıkenov.
