Qazaqstandaǵy vaktsına sapasy qalaı tekseriledi

NUR-SULTAN. QazAqparat - Dárilik zattar men medıtsınalyq buıymdardy saraptaý ulttyq ortalyǵynyń bas dırektory Arnur Nurtaev elimizdegi vaktsına sapasyna qatysty pikirlerge jaýap berdi, dep habarlaıdy QazAqparat tilshisi.

«Bizdiń memlekettik reestrde vaktsınanyń 64 ataýy tirkelgen. Olar eń aldymen Belgııa, Frantsııa, Nıderlandy syndy Eýropa elderinde jáne AQSh, Reseı, Qytaı, Úndistan, Koreıa, Izraılde óndirilgen. Sapasyna kelsek, vaktsınalardy tirkeýge alarda eki deńgeıli tekserýden ótkizemiz. Birinshi kezeńde - tirkeýge kelip túsken barlyq qujattarǵa saraptama júrgiziledi. Ekinshi kezeńde - qujattary tekserilgen árbir vaktsınaǵa zerthanalyq taldaý jasalady. Zerthanalyq taldaý degenimiz - úlken protsess. Onda árbir vaktsınanyń sapasy men qaýipsizdigi jiti tekseriledi.

Ortalyq Azııa aýmaǵynda qazaqstandyq zerthana alǵash ret Eýropa dırektoratynyń zerthana sapasy boıynsha akkredıtatsııasyn aldy.

«Bizdiń zerthana jylyna 3 ret sapa boıynsha eýropalyq dırektorattyń akkredıtatsııasynan ótedi. Eýropalyq organdar bizdiń derekterimizge senim artady. Tirkeýden ótken vaktsınanyń árbir partııasy Qazaqstan Respýblıkasynyń aýmaǵyna kirerde mindetti sapa men qaýipsizdik baǵalaýynan ótedi. Eger vaktsına halyqaralyq uıymdar arqyly alynsa, Dúnıejúzilik densaýlyq saqtaý uıymynyń deńgeıinde tekserýden ótedi», - dedi Arnur Nurtaev.

Qazirgi ýaqytta Qazaqstannyń ulttyq kúntizbesinde DDSU 20 vaktsınany qaıta bekitti.

«20 vaktsına 28 mlrd teńgeden astam somaǵa satyp alynady jáne bir jasqa deıingi 370 myń balany qamtıdy. Tirkeýden keıingi baqylaýdy Farmatsııalyq qadaǵalaý júıesi júrgizedi. Naryqtaǵy ekpeden qandaı da bir janama áser týyndasa, farmakobaqylaý saraptama júrgizedi. Biz ekpeden paıda bolýy múmkin degen árbir janama áserdi baqylaýǵa alamyz. Sońǵy bir jarym jylda janama áser týraly 70 shaǵym kelip tústi. 370 myń balaǵa ekpe salyp, 70 shaǵym aldyq. Bul 70 shaǵymdy da tekserdik, kúrdeli, aýyr oqıǵalar anyqtalmady», - dedi A. Nurtaev.