Qazaqstandaǵy úzdik jas maman men eńbek áýleti anyqtalady
ASTANA. QazAqparat - Eńbek áýletteri men óndiris eńbekkerleri arasynda ótkiziletin «Eńbek joly» respýblıkalyq baıqaýyna ótinimderdi qabyldaý bastaldy.
Bul týraly búgin QR Eńbek jáne halyqty áleýmettik qorǵaý vıtse-mınıstri Birjan Nurymbetov málim etti, dep habarlaıdy QazAqparat.
«Jalpyǵa ortaq eńbek qoǵamyn qurý ıdeıasy aıasynda eńbek adamynyń mártebesin arttyrý, eńbek ónimdiligin kóterý, jumysshy kásipterdi nasıhattaý, jastardy óndiriske tartý jáne eńbek áýletteriniń jyldar boıǵy dástúrin nyǵaıtý maqsatynda Memleket basshysynyń Jarlyǵymen «Eńbek kúni» merekesi bekitilgen bolatyn. Ol jyl saıyn qyrkúıek aıynyń sońǵy jeksenbisinde atalyp ótiledi. Ótken jyly Jalpyǵa ortaq eńbek qoǵamy ıdeıasyn nasıhattaý maqsatynda Eńbek mınıstrligi eńbek áýletteri men óndiris eńbekkerleri arasynda «Eńbek joly» respýblıkalyq baıqaýyn bekitken bolatyn. Bul baıqaýdyń maqsaty qazaqstandyqtardyń boıynda el ekonomıkasynyń damýyna aıtarlyqtaı eńbek sińirgen otandastarymyzdyń jetistigine maqtanysh sezimin oıatý dep bilemiz», - dedi Nurymbetov.
Onyń aıtýynsha, «Úzdik eńbek áýleti», «Óndiristiń úzdik jas mamany», «Jumys isteıtin jastardyń úzdik tálimgeri» syndy úsh atalymnan turady. Baıqaý aldymen óńirlik deńgeıde, odan keıin respýblıkalyq deńgeıde uıymdastyrylady. Birinshi kezeńde ár óńirden úzdik úshtik onlaın-daýys berý arqyly anyqtalady. Osydan keıin oblystyq jáne respýblıkalyq deńgeıdegi komıssııalar onlaın-daýys berý nátıjesinde úzdik shyqqandardyń ishinen jeńimpazdardyń esimderin ataıtyn bolady.
«Mamyr aıynda biz baıqaýǵa ótinimderdi qabyldaýdy bastamaqpyz. 1-31 tamyz aralyǵynda daýys berý kezeńi ótkizilip, óńirlik deńgeıdegi jeńimpazdar anyqtalady. 8-22 qyrkúıek aralyǵynda óńirlik eńbekkerler forýmy ótkizilip, aımaqtyq jeńimpazdar ulyqtalady. Dál osyndaı shara respýblıkalyq deńgeıde de ótkiziledi. ıAǵnı, qyrkúıek aıynyń sońǵy jeksenbisi - 27-si kúni respýblıkalyq forým ótip, onda elimiz «Eńbek joly» baıqaýy jeńimpazdarynyń esimderin biletin bolady», - dedi vıtse-mınıstr.
