Qazaqstandaǵy úzdik eńbek áýleti marapattaldy
ASTANA. QazAqparat - Elordada Eńbek kúni men Áleýmettik qorǵaý qyzmetkerleri kúnine oraı «Jalpyǵa Ortaq Eńbek qoǵamyna qaraı» respýblıkalyq forýmy ótti, dep habarlaıdy QazAqparat.
«Barlyǵyńyzdy bárimizge ortaq kásibı merekemizben quttyqtaımyn! Biz búgin «Jalpyǵa Ortaq Eńbek Qoǵamyna qaraı» respýblıkalyq forýmyn ótkizip otyrmyz, bul forým Eńbek adamynyń qoǵamdaǵy bedelin kórsetedi ári eńbek áýletiniń kóp jylǵy dástúrin nyǵaıtýǵa jáne jastardy óndiris salasyna tartýǵa baǵyttalǵan», - dedi Eńbek jáne halyqty áleýmettik qorǵaý mınıstri Mádına Ábilqasymova.
Sonymen qatar ol Memleket basshysynyń jańa Joldaýy árbir qazaqstandyqtyń ómir súrý sapasyn jaqsartýdyń naqty qadamdary ekenin atap ótti.
«Ómir súrý sapasyn jaqsartý úshin jergilikti jerlerde áleýmettik, kólik jáne turǵyn úı ınfraqurylymyn damytýǵa, halyqty sapaly jáne qoljetimdi turǵyn úımen qamtamasyz etýge aýqymdy ınvestıtsııalar júzege asyrylatyn bolady. Sonymen qatar, bul barlyǵymyzǵa úlken jaýapkershilik júkteıdi. Halyqtyń tabysyn arttyrý jumyspen qamtý jáne jumysqa ornalastyrý múmkindigine, eńbek ónimdiligin arttyrýǵa baılanysty», - dedi mınıstr.
Forým aıasynda eńbekshilerdiń fotokórmesi ótip, eńbek ardagerlerine qurmet kórsetildi, sonymen qatar «Eńbek joly» jáne «Áleýmettik qorǵaý júıesindegi úzdik qyzmetker» respýblıkalyq konkýrstarynyń jeńimpazdary saltanatty túrde marapattaldy.
«Eńbek joly» baıqaýy eńbek áýletteri men óndiris jumyskerleri arasynda ótkiziledi. Onda «Úzdik eńbek áýleti», «Óndiristegi eń jas úzdik jumysker» jáne «Jumys isteıtin jastardyń úzdik tálimgeri» sııaqty úsh atalym boıynsha jeńimpazdar anyqtaldy.
Bıyl Qurmanǵalıevter otbasy «Úzdik eńbek áýleti» atalymynda jeńimpaz atandy. Barlyq otbasy múshelerin jekelep eseptegende orman sharýashylyǵyndaǵy eńbek ótili 458 jyl. Bul otbasynyń 25 múshesi tórt urpaq sabaqtastyǵymen osy salada eńbek etip keledi.
Budan bólek, onlaın-daýys berý men repsýblıkalyq komıssııanyń sheshimi boıynsha Sotqarov Ábilqaıyr Áýtaıuly «Jumys isteıtin jastardyń úzdik tálimgeri» atalymynda ozyp shyqty. Ol Aqtóbe oblysyndaǵy «Kazhrom TNK» aktsıonerlik qoǵamynda metallýrg bolyp jumys isteıdi.
Al «Óndiristegi úzdik jas jumysker» atalymynda Atyraý oblysyndaǵy «Dossormunaıgaz» kásipornynyń jumyskeri Tursynbek Aıbek Tursynbekuly jeńiske jetti.
Dástúr boıynsha Forým aıasynda Áleýmettik qorǵaý júıesiniń qyzmetkerleri kúni qarsańynda sala qyzmetkelerin marapattaý rásimi ótkizildi.
Aǵymdaǵy jyly Eńbek jáne halyqty áleýmettik qorǵaý mınıstrligi «Áleýmettik qorǵaý júıesindegi úzdik qyzmetker» ataǵy úshin ІІІ respýblıkalyq konkýrsty ótkizdi. Bul turǵyda elimizdiń ár óńirinde jumys isteıtin áleýmettik saladaǵy birqatar qyzmetkerler respýblıkalyq komıssııanyń sheshimimen jeńimpaz atandy.
Osy oraıda «Zeınetaqy júıesindegi úzdik qyzmetker», «Áleýmettik sala júıesindegi úzdik qyzmetker», «Úzdik medıtsınalyq-áleýmettik mekeme», «Úzdik áleýmettik úkimettik emes uıym», «Jumyspen qamtý ortalyǵynyń úzdik qyzmetkeri», «Áleýmettik salanyń úzdik menedjer-uıymdastyrýshysy», «Úzdik memlekettik eńbek ınspektory» atalymdarynda sapaly qyzmet kórsetken mamandar marapatqa ıe boldy.
Osyǵan deıin elimizde 2018 jyldyń sońyna deıin eńbek kitapshasy alynyp tastalatynyn habarlaǵanbyz.
