Qazaqstandaǵy úsh áýe kompanııasy avıatsııalyq qyzmetpen aınalysý quqyǵy sertıfıkatynan aıyryldy - QR KKM
ASTANA. 17 shilde. QazAqparat - Úsh qazaqstandyq áýe kompanııasy «D.E.T.A. Air», «MEGA» jáne «QazEır Ýest» ushýdy júzege asyrýǵa ruqsat beretin sertıfıkattan aıyryldy, dep habarlady primeminister.kz saıty Kólik jáne komýnıkatsııa mınıstrliginiń baspasóz qyzmetine silteme jasap.
«QR KKM Azamattyq avıatsııa komıteti qyzmetkerleri IKAO sarapshylarymen birlese otyryp júrgizgen qaıta sertıfıkattaý nátıjesinde «D.E.T.A. Air» AQ, AK «MEGA» AQ jáne «QazEır Ýest» AQ áýe kompanııalarynyń ushýdy júzege asyrýǵa ruqsat beretin sertıfıkatyn qaıtaryp aldy», - delingen vedomstvo málimdemesinde.
Sonymen qatar, bul sharalar kompanııalardyń óz qyzmetterin sertıfıkatsııalyq talaptarǵa saı júrgizbeýine oraı qabyldanyp otyrǵany aıtylǵan.
Budan ózge, sertıfıkatsııalyq tekserýler boıynsha anyqtalǵan eskertýlerge sáıkes, atap aıtqanda kompanııa shtatyndaǵy qyzmetkerler sanynyń az bolýy, ushý qujattarynyń, ınjenerlik-tehnıkalyq qyzmet kórsetýdiń talaptarǵa saı bolmaýyna oraı 5 áýe kompanııasynyń «Samal Air» AQ, «Azııa Kontınental Eırlaıns» AQ, «Evro-Azııa Interneıshnl» AQ, «Semeıavıa» AQ jáne «Irtysh-Air» AQ paıdalanýshy sertıfıkatynyń jaramdylyq merzimi toqtatyldy.
QR KKM atalǵan kompanııalar berilgen eskertýlerdi aǵymdaǵy jylǵy 1 tamyzǵa deıin joımaǵan jaǵdaıda olardyń sertıfıkattary óz kúshin joıatynyn eskertti.
Esterińizge sala keteıik, halyqaralyq ushýlardy júzege asyrýmen aınalysatyn qazaqstandyq áýe kompanııalary men áýe kemelerin qaıta sertıfıkattaý protsesi IKAO-nyń usynysy boıynsha aǵymdaǵy jyldyń naýryz aıynda bastalǵan bolatyn.
Búgingi kúni 32 áýe kompanııasy, tehnıkalyq qyzmet kórsetýmen aınalysatyn 29 uıym jáne 73 áýe kemesi qaıta sertıfıkattaýdan ótti.
Azamattyq avıatsııa komıteti atalǵan jumysty tamyz aıynyń sońyna deıin tolyq aıaqtaýdy kózdep otyr.
